સંચાર મંત્રી જ્યોતિરાદિત્ય સિંધિયાએ લોક્સભામાં સ્પષ્ટપણે કહ્યું છે કે ’સંચાર સાથી’ એપ દ્વારા જાસૂસી બિલકુલ શક્ય નથી. તેમણે જણાવ્યું હતું કે આ એપ જનતાની સલામતી અને સહાય માટે બનાવવામાં આવી છે. અમારો લોકોની પ્રવૃત્તિઓ પર નજર રાખવાનો કોઈ ઈરાદો નથી. તાજેતરમાં, મંત્રાલયે બધી સ્માર્ટફોન કંપનીઓને આ એપ પહેલાથી ઇન્સ્ટોલ કરેલા નવા મોબાઇલ ફોન વેચવાનો આદેશ આપ્યો છે. તેને સોટવેર અપડેટ દ્વારા હાલના ફોનમાં પણ ઉમેરવામાં આવશે.
પ્રશ્ર્નકાળ દરમિયાન, સિંધિયાએ કહ્યું, આ એપ ફક્ત યુઝરની સલામતી માટે છે. તેની સાથે જાસૂસી શક્ય નથી, અને ભવિષ્યમાં પણ શક્ય બનશે નહીં. સરકાર ઇચ્છે છે કે લોકો પોતાની સુરક્ષા માટે ટેકનિકલ માયમોથી સજ્જ હોય. મંત્રાલયના ૨૮ નવેમ્બરના આદેશમાં કંપનીઓને ફોન સેટઅપ દરમિયાન સંચાર સાથી એપ દેખાય તેની ખાતરી કરવા પણ કહેવામાં આવ્યું હતું. એપની કોઈપણ સુવિધાને અક્ષમ અથવા મર્યાદિત કરી શકાતી નથી. જોકે, સિંધિયાએ મંગળવારે એમ પણ કહ્યું હતું કે જો કોઈ યુઝર એપનો ઉપયોગ કરવા માંગતો નથી, તો તેઓ તેને તેમના ફોનમાંથી દૂર કરવા માટે સ્વતંત્ર છે.
કોંગ્રેસના સાંસદ રણદીપ સિંહ સુરજેવાલાએ કેન્દ્ર સરકારની સંચાર સાથી એપ અંગે રાજ્યસભામાં ગંભીર પ્રશ્ર્નો ઉઠાવ્યા હતા. તેમણે કહ્યું હતું કે આ એપ નાગરિકોના ગોપનીયતાના અધિકારને સંપૂર્ણપણે નબળી પાડી શકે છે. સુરજેવાલાએ આરોપ લગાવ્યો કે આ એપ કોઈપણ યુઝરના રીઅલ-ટાઇમ લોકેશન, સર્ચ હિસ્ટ્રી અને નાણાકીય વ્યવહારોને એક્સેસ કરી શકે છે, અને એસએમએસ અને વોટ્સએપ ચેટ્સનું પણ નિરીક્ષણ કરી શકે છે. તેમણે દાવો કર્યો કે સરકારે આ એપને દરેક ફીચર ફોન અને સ્માર્ટફોન પર પ્રી-ઇન્સ્ટોલ કરવાનો આદેશ આપ્યો છે. તેને દૂર કરી શકાતી નથી અથવા અક્ષમ કરી શકાતી નથી.
સાંસદે એવો પણ પ્રશ્ર્ન ઉઠાવ્યો કે જો એપમાં કિલ સ્વિચ હોય, તો સરકાર કોઈપણ ફોનને તાત્કાલિક બંધ કરી શકે છે. તેમણે આરોપ લગાવ્યો કે આનાથી પત્રકારો, વિપક્ષી નેતાઓ અને અસંમતિ દર્શાવનારાઓને નિશાન બનાવવાનું સરળ બનશે. તેમણે ચિંતા વ્યક્ત કરી કે આ એપ પાસવર્ડ, બેંક ખાતાની માહિતી અને વ્યક્તિગત ડેટા સરકારી એજન્સીઓ અથવા હેર્ક્સ સમક્ષ ખુલ્લા પાડી શકે છે.
સુરજેવાલાએ કહ્યું કે આ સિસ્ટમ લાખો ઉપકરણોને મહિનાઓ સુધી જોખમમાં મૂકી શકે છે. તેમણે સરકાર દ્વારા અપડેટ બહાર પાડવાનું ઉદાહરણ આપ્યું પરંતુ સેમસંગ જેવી કંપની તેના રોલઆઉટમાં ત્રણ મહિના વિલંબ કરે છે. તેથી, આ સમય દરમિયાન, તે કંપનીના બધા ફોન હેકિંગના જોખમમાં રહેશે.
કોંગ્રેસના સાંસદે કેન્દ્ર સરકાર પાસેથી ત્રણ મુખ્ય પ્રશ્ર્નોના જવાબો માંગ્યા:
આવા ફરજિયાત એપ ઇન્સ્ટોલેશન માટે કાનૂની અધિકાર શું છે?
ફરજિયાત સોટવેર અપડેટ્સ કયા અધિકાર હેઠળ લાગુ કરવામાં આવી રહ્યા છે?
શું કોઈ સ્વતંત્ર સુરક્ષા ઓડિટ, ડેટા સુરક્ષા પગલાં અને દુરુપયોગ અટકાવવાની પદ્ધતિઓ અસ્તિત્વમાં છે?