ઇટાલીની આતંકવાદ વિરોધી પોલીસે હમાસ માટે ફંડ એકત્ર કરવાના આરોપમાં ત્રણ ચેરિટી સંસ્થાઓ સાથે સંકળાયેલા નવ લોકોની ધરપકડ કરી છે. તેમના પર પેલેસ્ટિનિયન આતંકવાદી સંગઠન હમાસને લાખો યુરો મોકલવાનો આરોપ છે. આતંકવાદ વિરોધી ફરિયાદીઓએ એક નિવેદનમાં જણાવ્યું હતું કે આરોપીઓ પર આશરે ૭ મિલિયન યુરો, અથવા આશરે ૭૪ કરોડ (આશરે ૭૪ કરોડ) ગાઝા, પેલેસ્ટિનિયન પ્રદેશો અથવા ઇઝરાયલમાં હમાસની માલિકી, નિયંત્રણ અથવા સંલગ્ન સંસ્થાઓને મોકલવાનો આરોપ છે. ઇટાલીના વડા પ્રધાન જ્યોજયા મેલોની તેમના આતંકવાદ વિરોધી વલણ માટે જાણીતા છે.
નિવેદનમાં કહેવામાં આવ્યું છે કે ધરપકડ કરાયેલા લોકોમાં ઇટાલીમાં પેલેસ્ટિનિયન એસોસિએશનના પ્રમુખ મોહમ્મદ હનૌનનો પણ સમાવેશ થાય છે. ફરિયાદીઓએ તેમને ઇટાલીમાં હમાસ સેલના વડા તરીકે વર્ણવ્યા હતા. યુરોપિયન યુનિયને હમાસને આતંકવાદી જૂથ તરીકે સૂચિબદ્ધ કર્યું છે. ઇટાલિયન ફરિયાદીઓના જણાવ્યા અનુસાર, તપાસમાં અન્ય ઇયુ દેશોનો પણ સહયોગ મળ્યો હતો. ગેરકાયદેસર ભંડોળ ત્રિકોણ કામગીરી દ્વારા ટ્રાન્સફર કરવામાં આવ્યું હતું, એટલે કે, બેંક ટ્રાન્સફર અથવા વિદેશી સંગઠનો દ્વારા. આ નાણાં ગાઝામાં એવા સંગઠનોને ટ્રાન્સફર કરવામાં આવ્યા હતા જેને ઇઝરાયલે હમાસ સાથેના તેમના સંબંધોને કારણે ગેરકાયદેસર જાહેર કર્યા છે.
ધરપકડ પછી, મેલોનીએ ઠ પોસ્ટમાં કહ્યું, હું આ મહત્વપૂર્ણ કામગીરીની સફળતાથી ખુશ છું, જેના કારણે હમાસને ૭ મિલિયન યુરોથી વધુ ભંડોળ પૂરું પાડવાના આરોપમાં નવ વ્યક્તિઓની ધરપકડ કરવામાં આવી. આ ધરપકડો કહેવાતા ચેરિટેબલ સંગઠનો દ્વારા કરવામાં આવી હતી જે ખરેખર આતંકવાદી પ્રવૃત્તિઓને ભંડોળ પૂરું પાડતા હતા. તેમાં ઇટાલીમાં પેલેસ્ટિનિયનોના સંગઠનના પ્રમુખ મોહમ્મદ મહમૂદ અહેમદ હનૌનનો સમાવેશ થાય છે, જેમને તપાસર્ક્તાઓએ હમાસની વિદેશી શાખાના સભ્ય અને ઇટાલીમાં હમાસ સેલના નેતા તરીકે વર્ણવ્યા હતા. આ કાર્યવાહીથી આતંકવાદી નાણાકીય નેટવર્કને ગંભીર ફટકો પડ્યો છે.
ઇટાલીના ગૃહમંત્રી માટ્ટેઓ પિયાન્ટેડોસીએ સોશિયલ મીડિયા પ્લેટફોર્મ એકસ પર લખ્યું હતું કે આ કાર્યવાહીથી એવા વર્તન અને પ્રવૃત્તિઓનો પર્દાફાશ થયો છે જે પેલેસ્ટિનિયન વસ્તીના પક્ષમાં પહેલની આડમાં આતંકવાદી સંગઠનોને ટેકો અને સંડોવણી છુપાવી રહ્યા હતા. આરોપીઓ અથવા સંડોવાયેલા સંગઠનો તરફથી આ બાબતે તાત્કાલિક કોઈ ટિપ્પણી કરવામાં આવી ન હતી. જાન્યુઆરી ૨૦૨૫ માં, યુરોપિયન કાઉન્સિલે હમાસ અને પેલેસ્ટિનિયન ઇસ્લામિક જેહાદને ભંડોળ પૂરું પાડતી ૧૨ વ્યક્તિઓ અને ત્રણ સંસ્થાઓ સામે હાલના પ્રતિબંધો લંબાવવાનો નિર્ણય લીધો.