દાહોદ જીલ્લામાં કાયદો અને વ્યવસ્થા જાળવવા જાહેરનામું પ્રસિદ્ધ : ૧૮ થી ૩૦ નવેમ્બર દરમિયાન પાંચ કે તેથી વધુ વ્યક્તિઓના એકત્ર થવા પર પ્રતિબંધ

દાહોદ જીલ્લામાં કાયદો અને વ્યવસ્થાની પરિસ્થિતિ જાળવી રાખવા તેમજ સંભવિત અશાંતિને રોકવા માટે જીલ્લા વહીવટી તંત્ર દ્વારા મહત્ત્વપૂર્ણ પગલું ભરવામાં આવ્યું છે. અધિક જીલ્લા મેજીસ્ટ્રેટ, દાહોદ દ્વારા ગુજરાત પોલીસ અધિનિયમ-૧૯૫૧ની કલમ ૩૭(૩) અન્વયે સમગ્ર દાહોદ જીલ્લાના મહેસૂલી હદ વિસ્તારમાં પ્રતિબંધાત્મક હુકમો ફરમાવવામાં આવ્યા છે.

પોલીસ અધિક્ષક, દાહોદની દરખાસ્ત અને જીલ્લામાં અગાઉ વર્ગ વિગ્રહના બનેલા બનાવોને ધ્યાનમાં રાખીને આ જાહેરનામું બહાર પાડવામાં આવ્યું છે.

મુખ્ય પ્રતિબંધો:

સભા અને સરઘસ પર રોક: સમગ્ર દાહોદ જીલ્લાની હદમાં સક્ષમ અધિકારીની પરવાનગી વગર પાંચ કે તેથી વધુ વ્યક્તિઓ એકઠા થવા પર તેમજ કોઈપણ પ્રકારની સભા યોજવા કે સરઘસ કાઢવા પર સખત પ્રતિબંધ રહેશે.

અધિકૃત અધિકારીઓ: આ હુકમનો ભંગ કરનાર સામે ભારતીય ન્યાય સંહિતા, ૨૦૨૩ તથા ગુજરાત પોલીસ એક્ટની જોગવાઈઓ મુજબ કાયદેસરની દંડાત્મક કાર્યવાહી કરવામાં આવશે.

આ પ્રતિબંધાત્મક હુકમ નીચે મુજબની બાબતોને લાગુ પડશે નહીં:

સરકારના વિભાગો અથવા કચેરીઓ દ્વારા આયોજીત કાર્યક્રમો અને રેલીઓ.

સરકારી ફરજ કે કામગીરી પર રહેલા અધિકારીઓ/કર્મચારીઓ તેમજ હોમગાર્ડ કે અન્ય અર્ધલશ્કરી એજન્સીના જવાનો.

સ્મશાનયાત્રા અને લગ્ન પ્રસંગના વરઘોડા.

આ જાહેરનામું તારીખ ૧૮/૧૧/૨૦૨૬ થી તારીખ ૩૦/૧૧/૨૦૨૬ (બંને દિવસો સહિત) સુધી સમગ્ર દાહોદ જીલ્લાના વિસ્તારમાં અમલમાં રહેશે.

તંત્ર દ્વારા નાગરિકોને કાયદો અને વ્યવસ્થા જાળવી રાખવા તેમજ આ જાહેરનામાનું ચુસ્તપણે પાલન કરવા અનુરોધ કરવામાં આવ્યો છે.