તેલંગાણાના સંગારેડ્ડી જિલ્લામાં 25 વર્ષીય મહિલાએ માયર્મેકોફોબિયા (કીડીઓના ડર)ને કારણે આત્મહત્યા કરી હતી. પોલીસે શનિવારે જણાવ્યું હતું કે મહિલાના લગ્ન 2022માં થયા હતા અને તેને ત્રણ વર્ષની પુત્રી પણ છે. તે 4 નવેમ્બરના રોજ તેના ઘરમાં છતના પંખા સાથે લટકતી હાલતમાં મળી આવી હતી.
ઘટના પહેલા, તે તેની પુત્રીને એક સંબંધીના ઘરે મૂકીે ગઈ હતી, એમ કહીને કે તે ઘરની સફાઈ કરી રહી છે અને તેને પછી લેવા આવશે. તેનો પતિ તે સાંજે કામ પરથી પાછો ફર્યો ત્યારે દરવાજો અંદરથી બંધ જોયો. પડોશીઓએ દરવાજો તોડવામાં મદદ કરી અને અંદર મહિલા મૃત હાલતમાં મળી.
પોલીસને સ્થળ પરથી એક સુસાઈડ નોટ પણ મળી જેમાં તેણે લખ્યું હતું-
શ્રી, માફ કરશો. હું આ કીડીઓ સાથે રહી શકતી નથી. દીકરીનું ધ્યાન રાખજો અને સાવચેત રહેજો. અન્નાવરમ, તિરુપતિ ₹1,116… યેલ્મ્મા વાદી બિયમને ભૂલશો નહીં.
નોંધમાં અન્નવરમ અને તિરુપતિ મંદિરો અને ₹1,116 ની રકમનો ઉલ્લેખ છે, જે દાન સૂચવે છે. અમીનપુર પોલીસે કેસ નોંધીને તપાસ શરૂ કરી છે.
નાનપણથી જ કીડીઓથી ડરતી હતી આ સ્ત્રી
પોલીસે જણાવ્યું હતું કે મહિલા બાળપણથી જ કીડીઓથી ડરતી હતી અને તેની સારવાર માટે તેણે મંચેરિયલમાં કાઉન્સેલિંગ લીધું હતું. પોલીસનું માનવું છે કે સફાઈ કરતી વખતે કીડીઓ જોયા પછી તે ગભરાઈ ગઈ હશે, જેના કારણે તેણે આ પગલું ભર્યું હશે.
ડૉક્ટરે કહ્યું- મેં આવો કેસ પહેલાં ક્યારેય જોયો નથી તેલંગાણા ઇન્સ્ટિટ્યૂટ ઓફ મેન્ટલ હેલ્થ (IMH)ના સુપરિન્ટેન્ડેન્ટ ડૉ. અનિતા રાયરાલાએ જણાવ્યું હતું કે માયર્મેકોફોબિયા એક ખૂબ જ અનોખો ફોબિયા છે અને તેમણે આવો કેસ પહેલાં ક્યારેય જોયો નથી.
તેમણે કહ્યું કે ફોબિયા સામાન્ય રીતે બાળપણમાં વિકસે છે અને એક્સપોઝર થેરાપી, જ્ઞાનાત્મક વર્તણૂકીય થેરાપી (CBT) અને દવા દ્વારા તેની સારવાર કરી શકાય છે. રૈરાલાએ કહ્યું કે ફક્ત ફોબિયાને કારણે આત્મહત્યાના કિસ્સાઓ ભાગ્યે જ જોવા મળે છે. શક્ય છે કે મહિલા ડિપ્રેશનથી પણ પીડાતી હોય.