પંચમહાલ જીલ્લામાં ગિલન-બારી સિન્ડ્રોમ (GBS)ના શંકાસ્પદ લક્ષણો ધરાવતા ત્રણ કેસ નોંધાતા આરોગ્ય તંત્ર સક્રિય બન્યું છે. મહીસાગર બાદ હવે પંચમહાલમાં પણ આવા કેસ સામે આવ્યા છે.
આ કેસ ગોધરા તાલુકાના ગદુકપુર અને મેરપ ગામમાં એક-એક, જ્યારે મોરવા હડફ તાલુકાના ચોપડા ફળિયામાં એક નોંધાયો છે.
ત્રણ શંકાસ્પદ કેસ સામે આવતા જ આરોગ્ય વિભાગ હરકતમાં આવ્યું છે. અસરગ્રસ્ત વિસ્તારોમાં ૮ થી ૧૦ ટીમો તૈનાત કરવામાં આવી છે. આ ટીમો દ્વારા આશરે ૬૦૦ ઘરોમાં સઘન સર્વેલન્સ હાથ ધરવામાં આવ્યું છે અને ૪૦૦થી વધુ બાળકોની આરોગ્ય તપાસ કરવામાં આવી છે.
રોગચાળો વધુ ન ફેલાય તે સુનિશ્ચિત કરવા માટે અસરગ્રસ્ત ગામોમાં દવાનો છંટકાવ અને ફોગિંગ જેવી કામગીરી પણ હાથ ધરવામાં આવી છે.
શંકાસ્પદ GBS કેસોના દર્દીઓ :
૧. માનવી અમિતભાઈ પગી (ઉંમર ૧.૫ વર્ષ), ગદુકપુર, ગોધરા તાલુકો.
૨. કેયાંશ રાકેશભાઈ ડાયરા (ઉંમર ૩.૫ વર્ષ), મેરપ, ગોધરા તાલુકો.
૩. પ્રિયાંશી ભરતભાઈ બારીયા (ઉંમર ૮ વર્ષ), ચોપડા ફળિયા, મોરવા હડફ તાલુકો.
ગદુકપુર ગામની ૧.૫ વર્ષીય માનવી અમિતભાઈ પગીની તબિયત ૧૯ ઓગસ્ટે લથડતા તેમને પ્રથમ ગોધરા સિવિલ હોસ્પિટલમાં દાખલ કરાયા હતા. ત્યારબાદ વધુ સારવાર માટે વડોદરાની જજૠ હોસ્પિટલમાં ખસેડવામાં આવ્યા, જ્યાં ૬ દિવસ સુધી સારવાર ચાલી. સ્થિતિમાં સુધારો ન થતાં તેમને ખાનગી હોસ્પિટલમાં લઈ જવાયા હતા.
હાલ બાળકીની તબિયત સારી હોવાનું જાણવા મળ્યું છે અને તેને હોસ્પિટલમાંથી રજા આપી દેવામાં આવી છે. દર્દીની માતા તેજલબેનના જણાવ્યા મુજબ, માનવીની સ્થિતિ સારી છે.