વડોદરા શહેરના આજવા રોડ પર વધુ એક ગમખ્વાર અકસ્માતની ઘટના સામે આવી છે. બેફામ ઝડપે દોડતી એક ફોર વ્હીલર કારના ચાલકે રોડ પરથી પસાર થઈ રહેલી વૃદ્ધાને પાછળથી જોરદાર ટક્કર મારી હતી. અકસ્માત એટલો ભયાનક હતો કે વૃદ્ધાનું ઘટનાસ્થળે જ કરુણ મોત નીપજ્યું હતું. સમગ્ર ઘટના નજીકમાં લાગેલા સીસીટીવી કેમેરામાં કેદ થઈ ગઈ છે, જેના ફૂટેજ હાલ સોશિયલ મીડિયામાં વાયરલ થઈ રહ્યા છે.
પ્રાપ્ત માહિતી અનુસાર, આ અકસ્માત ગઇકાલે (૩૧ મે) વહેલી સવારે અંદાજે ૬ઃ૩૨ કલાકે આજવા રોડ પર આવેલી નવી વસાહત પાસે બન્યો હતો.cctv ફૂટેજમાં સ્પષ્ટ જોવા મળે છે કે એક સફેદ રંગની કાર પૂરઝડપે આવી રહી હતી અને રોડ પરથી પસાર થઈ રહેલી વૃદ્ધાને પાછળથી જોરદાર ટક્કર મારી હતી. ટક્કર બાદ વૃદ્ધા હવામાં ફંગોળાઈ રોડ પર પટકાયા હતા. અકસ્માતમાં તેમને માથા તેમજ શરીરના અન્ય ભાગોમાં ગંભીર ઈજાઓ પહોંચી હતી, જેના કારણે તેમનું ઘટનાસ્થળે જ મોત નીપજ્યું હતું.
પ્રાથમિક માહિતી મુજબ, અકસ્માત સર્જનાર કારમાં વિદેશી યુવકો અને યુવતીઓ સવાર હતા. અકસ્માત બાદ કારમાંથી કેટલાક યુવકો અને યુવતીઓ નીચે ઉતરતા પણ સીસીટીવી ફૂટેજમાં જોવા મળ્યા હતા. ઘટનાની જાણ થતાં સ્થાનિક લોકોના ટોળેટોળા ઘટના સ્થળે એકઠા થઈ ગયા હતા.
આ મામલે આજવા રોડ પર આવેલી નવી વસાહત ખાતે રહેતા દીલીપભાઈ મોહનભાઈ ભાલીયાએ બાપોદ પોલીસ સ્ટેશનમાં ફરિયાદ નોંધાવી છે. ફરિયાદ મુજબ, તેમની માતા શારદાબેન મોહનભાઈ ભાલીયા (ઉં.વ. આશરે ૬૫ વર્ષ) સવારે ભાગ્યલક્ષ્મી સોસાયટી પાસેથી પગપાળા પસાર થઈ રહ્યા હતા, ત્યારે આ અકસ્માત સર્જાયો હતો.
અકસ્માત બાદ બાપોદ પોલીસે ગુનો નોંધી cctv ફૂટેજના આધારે વધુ તપાસ શરૂ કરી છે. કાર ચાલક કોણ હતો, કાર ક્યાંથી આવી હતી અને અકસ્માત સમયે કારની સ્પીડ કેટલી હતી તે સહિતના મુદ્દાઓની તપાસ ચાલી રહી છે.આ ઘટનાએ શહેરમાં ફરી એકવાર બેફામ વાહનચાલન અને રોડ સલામતી અંગે ગંભીર પ્રશ્નો ઉભા કર્યા છે.