જય નારાયણ હોસ્પિટલ ખાતે ડો. સુનિલભાઈ પરમારે પોતાના જન્મ દિવસની નિમિત્તે એક માનવતાવાદી અને સેવાકીય કાર્યનું આયોજન કર્યું હતું. ડો. પરમાર દ્વારા હોસ્પિટલ પરિસરમાં મફત કિડની સ્ટોન (પથરી) સારવાર કેમ્પ યોજવામાં આવ્યો હતો, જેમાં મોટી સંખ્યામાં જરૂરિયાતમંદ દર્દીઓએ હાજરી આપી હતી. આ વિશેષ કેમ્પનો કુલ ૧૭૫ જેટલા દર્દીઓએ લાભ લીધો હતો અને મફત તપાસ તથા સારવાર મેળવી હતી.
આ પ્રસંગે નરેન્દ્ર મોદી વિચાર મંચના હોદ્દેદારો અને સભ્યોએ વિશેષ ઉપસ્થિત રહી ડો. સુનિલભાઈ પરમારને જન્મદિવસની સાદર શુભેચ્છાઓ પાઠવી હતી. સાથે જ, જન્મદિવસ જેવા અંગત અવસરને સમાજસેવાના ઉત્તમ કાર્યમાં બદલવા બદલ તેમનું વિશેષ અભિનંદન કરી બહુમાન કરવામાં આવ્યું હતું.
કેમ્પની સાથે સાથે એક અન્ય સરાહનીય કાર્યક્રમનું પણ આયોજન કરવામાં આવ્યું હતું, જેમાં સ્થાનિક પ્રાથમિક શાળાના બાળકોને ચોકલેટ વિતરણ કરવામાં આવ્યું હતું. ઉપસ્થિત મહાનુભાવો અને ડો. પરમારે આ વિતરણ કાર્યક્રમમાં ભાગ લઈ નાના બાળકોનો ઉત્સાહ વધારી તેમને પ્રોત્સાહિત કર્યા હતા. ડો. સુનિલભાઈ પરમારના આ સેવાકાર્યની સમગ્ર વિસ્તારમાં ભારે સરાહના થઈ રહી છે.