પાકિસ્તાનના પ્રથમ ચીફ ઓફ ડિફેન્સ સ્ટાફ તરીકેના પોતાના પહેલા સંબોધનમાં, ફિલ્ડ માર્શલ અસીમ મુનીરે ફરી એકવાર ભારત વિરુદ્ધ ઝેર ઓક્યું છે અને ચેતવણી આપી છે. મુનીરે કહ્યું કે ભારતે કોઈ ભ્રમ ના રાખવો જોઈએ. ભારત દ્વારા ભવિષ્યમાં કરવામાં આવતી કોઈપણ આક્રમક કાર્યવાહીનો પાકિસ્તાન તરફથી વધુ મજબૂત જવાબ આપવામાં આવશે. પાકિસ્તાની ન્યૂઝ ચેનલ જીઓ ન્યૂઝના અહેવાલ મુજબ, મુનીરે નવા રચાયેલા સંરક્ષણ દળના મુખ્યાલયની સ્થાપનાને ઐતિહાસિક ગણાવી અને કહ્યું કે તેનો ઉદ્દેશ્ય સેના, વાયુસેના અને નૌકાદળની સંકલિત પ્રણાલી દ્વારા બહુ-ડોમેન કામગીરીને આગળ વધારવાનો છે.
સીડીએફની રચના થતાં જ સક્રિય દેખાતા મુનીરે વધતા અને બદલાતા જોખમો પર પ્રકાશ પાડ્યો અને કહ્યું કે નવા સ્થાપિત સંરક્ષણ દળના મુખ્યાલયના નેજા હેઠળ ત્રણેય સેવાઓનું એકીકરણ સમયની જરૂરિયાત છે. તેમણે વધુમાં કહ્યું, સંરક્ષણ દળનું મુખ્યાલય ત્રણેય સેવાઓના સંચાલનને એકીકૃત અને સુમેળ બનાવશે. ઉચ્ચ કમાન્ડના સંકલન સાથે, ત્રણેય સેવાઓ તેમની વ્યક્તિગત સ્વાયત્તતા અને સંગઠનાત્મક માળખાં જાળવી રાખશે.
મુનીરે ઓપરેશન સિંદૂર દરમિયાન પાકિસ્તાની લોકોની સ્થિતિસ્થાપક્તા અને સૈન્યના પ્રદર્શનની પ્રશંસા કરી, તેને ભવિષ્યના સંઘર્ષો માટે કેસ સ્ટડી ગણાવી. તેમણે કહ્યું, યુદ્ધ હવે સાયબરસ્પેસ, ઇલેક્ટ્રોમેગ્નેટિક સ્પેક્ટ્રમ, અવકાશ, માહિતી કામગીરી, કૃત્રિમ બુદ્ધિ અને ક્વોન્ટમ કમ્પ્યુટિંગ સુધી વિસ્તર્યું છે; તેથી, સશ દળોએ યુદ્ધની નવી જરૂરિયાતોને અનુરૂપ બનવું પડશે.
મુનીર હવે આર્મી ચીફ તરીકેનો તેમનો પાંચ વર્ષનો કાર્યકાળ તેમજ સીડીએફ પદ પણ સંભાળશે. ઓપરેશન સિંદૂર દરમિયાન ભારતે પાકિસ્તાનની સુરક્ષા સ્થાપનાને ભારે નુક્સાન પહોંચાડ્યા બાદ ફિલ્ડ માર્શલના પદ પર બઢતી પામેલા મુનીર દેશના બીજા ફિલ્ડ માર્શલ છે અને છ દાયકાથી વધુ સમયમાં પ્રથમ છે. રાષ્ટ્રપતિ ઝરદારીએ પાકિસ્તાન આર્મી, એરફોર્સ અને નેવી (સુધારા) બિલ ૨૦૨૫ ને મંજૂરી આપ્યા પછી સીડીએફ પદ બનાવવામાં આવ્યું હતું.