છોટા ઉદેપુર જિલ્લા LCBએ અત્રોલી પાસેથી રૂ. 4,61,288/- નો વિદેશી દારૂ ઝડપી પાડ્યો છે. આ કાર્યવાહીમાં એક વ્યક્તિની ધરપકડ કરવામાં આવી છે. દારૂ અર્ટિગા ગાડીમાં લઈ જવામાં આવી રહ્યો હતો.
છોટા ઉદેપુર એક સરહદી જિલ્લો હોવાથી, અહીં વિદેશી દારૂ ઘુસાડવાના પ્રયાસો અવારનવાર થતા રહે છે. જિલ્લા પોલીસ આવા પ્રયાસોને નિષ્ફળ બનાવે છે. LCB ટીમે વધુ એક દારૂની ખેપ પકડી પાડી છે.
જિલ્લા LCBની ટીમ રંગપુર પોલીસ મથકની હદમાં પેટ્રોલિંગ કરી રહી હતી. તે દરમિયાન તેમને બાતમી મળી હતી કે અત્રોલી વિસ્તારમાંથી એક અર્ટિગા ગાડીમાં વિદેશી દારૂ લઈ જવામાં આવી રહ્યો છે. આ બાતમીના આધારે LCB ટીમે અત્રોલી પાસે વોચ ગોઠવી હતી.
વોચ દરમિયાન, બાતમી મુજબની નંબર વગરની અર્ટિગા ગાડી આવતા તેને રોકવાનો પ્રયાસ કરાયો હતો. ગાડીનો ચાલક ગાડી ઊભી રાખીને ભાગી ગયો હતો, પરંતુ બાજુની સીટ પર બેઠેલો વ્યક્તિ ત્યાં જ હતો. LCBએ ગાડીની તપાસ કરતા તેમાંથી વિદેશી દારૂની 1735 બોટલ મળી આવી હતી, જેની કિંમત રૂ. 4,61,288/- છે.
LCBએ વિદેશી દારૂ અને અર્ટિગા ગાડી સહિત કુલ રૂ. 11,66,288/- નો મુદ્દામાલ જપ્ત કર્યો છે. ગાડીમાં સવાર કિરણ ઉર્ફે કિરીટ કંદુભાઈ રાઠવા (રહે. બડાખેડા આમલી, તા. કઠિવાડા, જી. અલીરાજપુર) ની ધરપકડ કરીને આગળની કાર્યવાહી હાથ ધરવામાં આવી છે.