યુવા મતદારોને મતદારયાદીમાં નામ નોંધાવવા જિલ્લા ચૂંટણી અધિકારી અને કલેક્ટર અર્પિત સાગર (IAS) અને નાયબ જિલ્લા ચૂંટણી અધિકારી અને નાયબ કલેક્ટરશ્રી એચ. ટી. મકવાણા દ્વારા અપીલ
ભારતના ચૂંટણી પંચ દ્વારા મતદારયાદીની સતત સુધારણા પ્રક્રિયા અંતર્ગત નવા તથા પ્રથમ વખત મતદાન કરવા માટે પાત્રતા ધરાવતા યુવા નાગરિકોનાં નામ મતદારયાદીમાં સમાવવા માટે ખાસ ઝુંબેશ હાથ ધરવામાં આવી છે. આ અભિયાન અંતર્ગત મહીસાગર જિલ્લામાં ચાર રવિવારના રોજ ખાસ ઝુંબેશનું આયોજન કરવામાં આવ્યું છે, જેના ભાગરૂપે તા. 18 ઓક્ટોબર, 2026ના રોજ યોજાયેલી બીજી ખાસ ઝુંબેશ દરમિયાન જિલ્લામાં કુલ 1,665 ફોર્મ નં. 6 ભરવામાં આવ્યાં હતાં.વિધાનસભા મતવિભાગવાર કામગીરીની વિગતો જોઈએ તો બાલાસિનોરમાં 564, લુણાવાડામાં 586 અને સંતરામપુરમાં 515 મળીને કુલ 1,665 નવા મતદારોની નોંધણી માટે અરજીઓ પ્રાપ્ત થઈ હતી, જે યુવા મતદારોને લોકશાહીની મુખ્યધારામાં જોડવાના પ્રયાસોને મોટું બળ પૂરું પાડે છે.
આગામી તા. 25 ઓક્ટોબર, 2026, રવિવારના રોજ ત્રીજી ખાસ ઝુંબેશ યોજાનાર છે. આ ઝુંબેશ દરમિયાન ખાસ કરીને 18 વર્ષ પૂર્ણ કરી ચૂકેલા તથા મતદારયાદીમાં નામ નોંધાવવા પાત્રતા ધરાવતા યુવાનો વધુમાં વધુ સંખ્યામાં ફોર્મ નં. 6 ભરીને મતદારયાદીમાં પોતાનું નામ નોંધાવે તે માટે જિલ્લા ચૂંટણી તંત્ર દ્વારા અપીલ કરવામાં આવી છે.
જિલ્લા ચૂંટણી અધિકારી અને જિલ્લા કલેક્ટરશ્રી અર્પિત સાગર (IAS) તથા નાયબ જિલ્લા ચૂંટણી અધિકારી અને નાયબ કલેક્ટરશ્રી એચ. ટી. મકવાણા દ્વારા જિલ્લાના તમામ પાત્ર યુવા નાગરિકોને લોકશાહીના પાયાને વધુ મજબૂત બનાવવા આ અભિયાનમાં સક્રિય ભાગીદારી નોંધાવવા ખાસ અપીલ કરવામાં આવી છે.
મતદારયાદીમાં નામ નોંધાવવું એ માત્ર વહીવટી પ્રક્રિયા નથી, પરંતુ લોકશાહી વ્યવસ્થામાં પોતાની ભાગીદારી સુનિશ્ચિત કરવાનું પ્રથમ પગથિયું છે. તેથી તમામ પાત્ર યુવાનો સમયસર ફોર્મ નં. 6 ભરીને મતદાર તરીકે નોંધણી કરાવે અને આગામી ચૂંટણીઓમાં પોતાના મતાધિકારનો ઉપયોગ કરવા સજ્જ બને, તે માટે જિલ્લા ચૂંટણી તંત્ર દ્વારા અનુરોધ કરવામાં આવે છે. “તમારું નામ મતદારયાદીમાં, તમારો અવાજ લોકશાહીમાં — આજે જ મતદાર નોંધણી કરાવો.”