ઉજ્જૈનના વિશ્વ પ્રસિદ્ધ મહાકાલેશ્વર મંદિર પરિસરમાં સોમવારે નાગચંદ્રેશ્વર મંદિર પાસે અચાનક નાસભાગ જેવી સ્થિતિ સર્જાઈ. જણાવવામાં આવી રહ્યું છે કે પરિસરમાં કરંટ ફેલાવાની અફવા બાદ શ્રદ્ધાળુઓમાં ભયનો માહોલ છવાઈ ગયો. ત્યારબાદ ભારે ભીડમાં લોકો આમતેમ ભાગવા લાગ્યા અને એકબીજાને ધક્કા મારવા લાગ્યા.
ઘટનાના વીડિયો પણ સામે આવ્યા છે. તેમાં મહાકાલ પરિસરમાં શ્રદ્ધાળુઓની ભારે ભીડ દેખાઈ રહી છે. પરિસર સંપૂર્ણપણે ભરેલું હતું અને મોટી સંખ્યામાં લોકો દર્શન માટે લાઈનમાં ઉભા હતા. અફવા બાદ નાસભાગ જેવી સ્થિતિ સર્જાઈ અને ઘણા શ્રદ્ધાળુઓ ભીડના દબાણમાં પડી ગયા.દબાણ વધવાથી ઘણા શ્રદ્ધાળુઓની તબિયત બગડી. લગભગ 13 શ્રદ્ધાળુઓને પરિવારજનો અને સુરક્ષાકર્મીઓ હોસ્પિટલ લઈ ગયા. તમામની ઉજ્જૈન જિલ્લા હોસ્પિટલમાં સારવાર ચાલી રહી છે અને ડોકટરો તેમની દેખરેખ રાખી રહ્યા છે.
ઘટનાસ્થળે હાજર પોલીસ અને વહીવટી સ્ટાફે પરિસ્થિતિને સંભાળી લીધી. મંદિરમાં આ દિવસોમાં મોટી સંખ્યામાં શ્રદ્ધાળુઓ પહોંચી રહ્યા છે. આવી સ્થિતિમાં અફવા ફેલાવવાથી થોડા સમય માટે પરિસ્થિતિ બગડી ગઈ. પોલીસના જણાવ્યા અનુસાર, હાલમાં પરિસ્થિતિ સંપૂર્ણપણે નિયંત્રિત છે.
નાગચંદ્રેશ્વર મંદિરમાં દર્શન કરવા ગયેલા એક પ્રત્યક્ષદર્શીએ જણાવ્યું કે મંદિરની બહાર ખૂબ ભીડ હતી. આ દરમિયાન નાસભાગ જેવી સ્થિતિ સર્જાઈ અને ઘણા લોકો પડી ગયા. એક છોકરો બેરિકેડિંગમાં પડીને ફસાઈ ગયો હતો, જોકે તેને પણ ઈજા થઈ ન હતી.અત્યાર સુધીમાં લગભગ 5.50 લાખ શ્રદ્ધાળુઓ નાગચંદ્રેશ્વરના દર્શન કરી ચૂક્યા છે. જણાવી દઈએ કે, ભગવાન નાગચંદ્રેશ્વરનું મંદિર મહાકાલ મંદિરના ત્રીજા માળે આવેલું છે. નાગપંચમી સિવાય આખું વર્ષ અહીં શ્રદ્ધાળુઓ માટે દરવાજા બંધ રહે છે.
આ જ કારણ છે કે નાગપંચમી પર દર્શન કરવા માટે દેશના અલગ-અલગ ભાગોમાંથી શ્રદ્ધાળુઓ ઉજ્જૈન પહોંચે છે. આ વખતે નાગપંચમી અને શ્રાવણનો ત્રીજો સોમવાર એક જ દિવસે હોવાથી ભીડ વધી ગઈ હતી.