છોટાઉદેપુર એલ.સી.બી. પોલીસે બાતમીના આધારે પાવીજેતપુર નજીક નાકાબંધી કરી હતી. તેમણે ભારતીય બનાવટના વિદેશી દારૂ ભરેલી એક ટાટા ટ્રક ઝડપી પાડી. ટ્રકમાંથી વિદેશી દારૂની કુલ 100 પેટી અને 5,000 ક્વાર્ટર બોટલ મળી આવી હતી. તેની કિંમત આશરે રૂ.16.05 લાખ છે. પોલીસે ટ્રક, બે મોબાઇલ ફોન સહિત કુલ રૂ.31.20 લાખનો મુદ્દામાલ જપ્ત કર્યો છે. આ કેસમાં બે આરોપીને પકડવામાં આવ્યા છે.
એલ.સી.બી. પોલીસ પેટ્રોલિંગ કરી રહી હતી. તે દરમિયાન તેમને ચોક્કસ બાતમી મળી હતી. આ બાતમીના આધારે પાવી ગામમાં રેલવે ગરનાળા પાસે પંચોની હાજરીમાં નાકાબંધી કરાઈ હતી. બાતમી મુજબની વાદળી તાડપત્રી ઢાંકેલી અને કેસરી રંગના ડાલાવાળી ટાટા ટ્રક (નંબર GJ-34-T-7269) દેવલીયા તરફથી આવી રહી હતી. પોલીસે તેને રોકીને તપાસ કરી હતી.
ટ્રકના ડ્રાઇવર કેબિનના ખાનાઓ અને કેબિનના ઉપરના ભાગે તાડપત્રી નીચે ખાખી રંગના બોક્સમાં ભારતીય બનાવટનો વિદેશી દારૂ છુપાવેલો મળ્યો હતો. પોલીસે ટ્રકમાં સવાર બે શખ્સોને ઝડપી પાડ્યા. તેમના નામ મુકેશ અંદરસીંગ બધેલ (ઉં.વ.27) અને મહેશ પિછા બધેલ (ઉં.વ.20) છે. બંને મધ્યપ્રદેશના અલીરાજપુર જિલ્લાના કઠીવાડા તાલુકાના ખટ્ટા ગામના પટેલ ફળિયાના રહેવાસી છે.
પોલીસે બંને આરોપીઓની અંગઝડતીમાંથી બે મોબાઇલ ફોન પણ જપ્ત કર્યા હતા. આ કાર્યવાહીમાં રૂ.16.05 લાખનો વિદેશી દારૂ, રૂ.15 લાખની ટાટા ટ્રક અને રૂ.15 હજારના બે મોબાઇલ ફોન મળી કુલ રૂ.31.20 લાખનો મુદ્દામાલ જપ્ત કરાયો છે.
પૂછપરછ દરમિયાન આરોપીઓએ જણાવ્યું કે, દારૂનો જથ્થો રાકેશ બામણીયાએ ટ્રકમાં ભરાવી આપ્યો હતો. રાકેશ મધ્યપ્રદેશના અલીરાજપુર જિલ્લાના કઠીવાડા તાલુકાના કોસંબા ગામનો રહેવાસી છે. દારૂ કઠીવાડા અને ભાભરા વચ્ચેના જંગલ વિસ્તારમાંથી ભરાવાયો હતો. રાજકોટ અને સત્તાધાર વચ્ચે પહોંચ્યા બાદ આગળનું લોકેશન મોબાઇલ દ્વારા આપવાનું હતું. પોલીસ તપાસમાં રાકેશ સાથેના મોબાઇલ સંપર્કો અને નાણાકીય વ્યવહારોની વિગતો પણ મળી છે.
આ મામલે છોટાઉદેપુર એલ.સી.બી. પોલીસે બે આરોપીઓની ધરપકડ કરી છે. રાકેશ બામણીયા અને દારૂ મંગાવનાર અજાણ્યા શખ્સ સહિત અન્ય આરોપીઓ સામે પણ ગુનો નોંધવામાં આવ્યો છે. તેમની સામે પ્રોહિબિશન એક્ટની વિવિધ કલમો અને ભારતીય ન્યાય સંહિતાની કલમ-111(3) હેઠળ કેસ દાખલ કરાયો છે. પોલીસે વધુ તપાસ હાથ ધરી છે.