ભાવનગર-તળાજા-સોમનાથ નેશનલ હાઈવે પર આજે વહેલી સવારે એક અત્યંત ગોઝારી ઘટના સામે આવી છે. તળાજા તાલુકાના ત્રાપજ ગામ નજીક હાઈવે પર ઉભેલા એક ટ્રેલર પાછળ પૂરપાટ ઝડપે આવી રહેલી બોલેરો કાર ધડાકાભેર ઘૂસી જતાં ૬ લોકોના ઘટનાસ્થળે જ કમકમાટીભર્યા મોત નિપજ્યા છે, જ્યારે એક વ્યક્તિ ગંભીર રીતે ઘાયલ થયો છે.
આ ઘટના અંગે મળતી માહિતી મુજબ, ભાવનગર-તળાજા-સોમનાથ નેશનલ હાઈવે પર આજે વહેલી સવારે એક બોલેરો કારમાં સવાર તમામ લોકો અલંગ શિપ બ્રેકિંગ યાર્ડના પ્લોટ નંબર ૨૪/મ્ અને પ્લોટ નંબર ૧૩૭ માં નોકરી અર્થે જઈ રહ્યા હતા. સવારના સમયે રોજની જેમ નોકરી પર જવા નીકળેલા આ કર્મચારીઓને રસ્તામાં જ કાળ ભરખી ગયો હતો. આ અકસ્માતના ભયાનક દ્રશ્યો નજીકના સીસીટીવી કેમેરામાં પણ કેદ થયા છે.
ત્રાપજ ગામ પાસે ટ્રેલરનો ચાલક પોતાનું વાહન રસ્તા પર ઉભું રાખીને ચા-પાણી પીવા માટે ગયો હતો. આ દરમિયાન પાછળથી પૂરપાટ ઝડપે આવી રહેલી બોલેરો કાર ટ્રેલરમાં પાછળના ભાગે ધડાકાભેર ઘૂસી ગઈ હતી. ટક્કર એટલી જારદાર હતી કે બોલેરો કારનો સંપૂર્ણ કચ્ચરઘાણ નીકળી ગયો હતો.
આ ભયાનક દુર્ઘટનામાં બોલેરોમાં સવાર ૬ લોકોના ઘટનાસ્થળે જ પ્રાણપંખેરુ ઊડી ગયા હતા. મૃતકોના નામની વાત કરીએ તો વિજયભાઈ, સાધુભાઈ, જીજ્ઞેશભાઈ, ભાર્ગવભાઈ, હિરેનભાઈ અને યોગેશભાઈનો સમાવેશ થાય છે. આ દુર્ઘટનામાં જયેશભાઈ નામના એક વ્યક્તિ ગંભીર રીતે ઘાયલ થયા છે. તેમને તાત્કાલિક હોસ્પિટલ ખસેડવામાં આવ્યા હતા, જ્યાં તેમની ગંભીર જણાતા વધુ સારવાર અર્થે શહેરની ખાનગી હોસ્પિટલમાં એડમિટ કરવામાં આવ્યા છે.
ઘટનાની જાણ થતાં જ પોલીસનો કાફલો પણ ઘટનાસ્થળે પહોંચી ગયો હતો. પોલીસે મૃતદેહોને પોસ્ટમોર્ટમ અર્થે હોસ્પિટલ મોકલી આપી આગળની કાયદાકીય કાર્યવાહી અને તપાસ હાથ ધરી છે. અકસ્માતનો અવાજ સાંભળીને આસપાસના સ્થાનિક લોકો અને રાહદારીઓ તુરંત જ મદદ માટે દોડી આવ્યા હતા.