ગુવાહાટીમાં રમાયેલી બીજી વનડેમાં ભારતે વેસ્ટ ઇન્ડિઝને આઠ વિકેટથી હરાવ્યું. વેસ્ટ ઈન્ડિઝે ભારત માટે ૪૦૬ રનનો વિશાળ લક્ષ્યાંક આપ્યો હતો, પરંતુ ટીમ ઇન્ડિયાએ સરળતાથી જીત મેળવી અને ત્રણ મેચની શ્રેણીમાં ૨-૦ની અજેય લીડ મેળવી લીધી. પાકિસ્તાન પણ ભારતના વિજયથી પ્રભાવિત થયું હતું, અને ભૂતપૂર્વ ખેલાડી કામરાન અકમલ ટીમ ઇન્ડિયાના વખાણ કર્યા વિના રહી શક્યા નહીં.વેસ્ટ ઈન્ડિઝે પ્રથમ બેટિંગ કરતા ત્રણ સદીની મદદથી ૪૦૫/૭ નો વિશાળ સ્કોર બનાવ્યો હતો. જવાબમાં, ભારતે ૪૩.૩ ઓવરમાં બે વિકેટ ગુમાવીને ૪૦૬ રન બનાવ્યા હતા, અને વનડે ઇતિહાસમાં તેમના સૌથી વધુ લક્ષ્યનો સફળતાપૂર્વક પીછો કર્યો હતો. કેપ્ટન શુભમન ગિલે ૧૩૩ બોલમાં ઐતિહાસિક અણનમ ૨૨૩ રન બનાવીને ભારતની જીતનું નેતૃત્વ કર્યું હતું. તેણે ૧૧૭ બોલમાં પોતાની બેવડી સદી પૂરી કરી, જે વનડે ક્રિકેટમાં બેવડી સદી ફટકારનાર સૌથી ઝડપી બેટ્સમેન બન્યો. ગિલે તેના સાથી ખેલાડી ઇશાન કિશનનો રેકોર્ડ તોડ્યો, જેણે ૨૦૨૨ માં બાંગ્લાદેશ સામે ૧૨૬ બોલમાં ૨૦૦ રન બનાવ્યા હતા. બીજી બાજુ, રોહિત શર્માએ પણ પોતાના અનુભવનો ઉત્તમ ઉપયોગ કર્યો. તેણે માત્ર ૭૫ બોલમાં ૧૦૧ રન બનાવ્યા. આ રોહિતની ૩૫મી વનડે સદી હતી.
ભારતની મોટી જીત અંગે, કામરાન અકમલે કહ્યું, “ભારતે વનડે ટી ૨૦ અને ટેસ્ટમાં તેનું સ્તર ખૂબ જ ઊંચું કર્યું છે. તેઓએ દરેક સ્થાન માટે ચાર રિપ્લેસમેન્ટ તૈયાર કર્યા છે, અને તે બધા પ્રદર્શન કરવા સક્ષમ છે. તેમની પાસે એટલા બધા ખેલાડીઓ છે કે તેઓએ ત્રણ ટીમો બનાવી છે. જા તમે વેસ્ટ ઇન્ડીઝ સામે રમી રહેલા ખેલાડીઓને જુઓ, તો તમને ખબર પડશે કે મુખ્ય ટીમ કઈ છે.”૪૦૬ રનના વિશાળ લક્ષ્યનો પીછો કરતા, ગિલ અને રોહિતે ભારતને મજબૂત શરૂઆત અપાવી. તેમણે માત્ર ૨૬.૨ ઓવરમાં પ્રથમ વિકેટ માટે ૨૫૫ રન ઉમેર્યા. રોહિત ૧૦૧ રન બનાવીને આઉટ થતાં આ ભાગીદારી તૂટી ગઈ. આ ભારતની બીજી સૌથી મોટી ઓપનિંગ ભાગીદારી છે. રોહિતના આઉટ થયા સમયે, ભારતને જીતવા માટે વધુ ૧૫૧ રનની જરૂર હતી, અને ગિલ ક્રીઝ પર હતો. ત્યારબાદ ગિલે ઇનિંગ્સને સ્થિર કરી, અંત સુધી અણનમ રહીને ભારતને ઐતિહાસિક જીત અપાવી.
ભારતે ૧૨ ઓવરમાં ૧૦૦ રન પૂરા કર્યા. ગિલે ૩૮ બોલમાં પોતાની અડધી સદી પૂરી કરી, જ્યારે રોહિતે માત્ર ૩૨ બોલમાં પોતાની અડધી સદી પૂરી કરી. બંનેની આક્રમક બેટિંગનો અંદાજ એ વાત પરથી લગાવી શકાય છે કે ભારતે ૨૨મી ઓવરમાં એક પણ વિકેટ ગુમાવ્યા વિના ૨૦૦ રન પૂરા કર્યા. વનડેમાં આ પહેલી વાર હતું જ્યારે ૩૫૦ થી વધુના લક્ષ્યનો પીછો કરતી વખતે ઓપનિંગ જાડીએ ૨૦૦ રનનો આંકડો પાર કર્યો હોય.