જયપુરના ખો-નાગોરિયન વિસ્તારમાં ફટાકડાના ફેક્ટરીમાં આગ લાગી છે. આ ઘટનામાં ઓછામાં ઓછા ૭ લોકોનાં મોત થયા છે.એસએમએસ મેડિકલ કોલેજના પ્રિન્સીપાલ અને હોસ્પીટલના કંટ્રોલર ડા. દીપક મહેશ્વરીએ આ માહિતી આપી હતી. અહેવાલો અનુસાર, મંગળવારે સવારે જયપુરના ખોહ નાગોરિયન વિસ્તારમાં કથિત રીતે ગેરકાયદેસર ફટાકડાના ગોદામમાં વિસ્ફોટ થયા પછી આગ ફાટી નીકળી હતી. અધિકારીઓએ જણાવ્યું હતું કે ખોહ નાગોરિયનના આયેશા નગર તલાઈ કોલોનીમાં એક નાના ઘરમાં આગ લાગી હતી, જ્યાં ફટાકડા સંગ્રહિત કરવામાં આવ્યા હતા.
રાજસ્થાનના મુખ્યમંત્રી ભજન લાલ શર્માએ અકસ્માત પર શોક વ્યક્ત કર્યો. ઇન્સ્ટાગ્રામ પર એક પોસ્ટમાં, મુખ્યમંત્રી ભજન લાલ શર્માએ કહ્યું, “જયપુરના ખોહ નાગોરિયન વિસ્તારમાં થયેલા અકસ્માતમાં જાનહાનિના સમાચાર દુઃખદ અને દુર્ભાગ્યપૂર્ણ છે. જિલ્લા વહીવટીતંત્ર અને સંબંધિત અધિકારીઓને રાહત અને બચાવ કામગીરીમાં સંપૂર્ણ તત્પરતા સાથે જાડાવા, ઘાયલોને શ્રેષ્ઠ તબીબી સંભાળ પૂરી પાડવા અને અસરગ્રસ્ત પરિવારોને શક્્ય તમામ સહાય પૂરી પાડવાનો નિર્દેશ આપવામાં આવ્યો છે. હું ભગવાનને પ્રાર્થના કરું છું કે તેઓ મૃતકોના આત્માઓને શાંતિ આપે, શોકગ્રસ્ત પરિવારોને આ અસહ્ય નુકસાન સહન કરવાની શક્તિ આપે અને તમામ ઘાયલોને ઝડપથી સ્વસ્થ થાય.”
જયપુરના કલેક્ટર સંદેશ નાયકે જણાવ્યું હતું કે પ્રાથમિક માહિતી મુજબ આગ પરિસરમાં સંગ્રહિત જ્વલનશીલ સામગ્રીને કારણે લાગી હશે. તેમણે કહ્યું, “ઘરમાં કેટલીક જ્વલનશીલ સામગ્રી હતી, પરંતુ આગ લાગવાનું ચોક્કસ કારણ વિગતવાર તપાસ પછી જ જાણી શકાશે.” પોલીસ કમિશનર સચિન મિત્તલે જણાવ્યું હતું કે ઘર રહેણાંક વિસ્તારમાં ગેરકાયદેસર રીતે કાર્યરત વેરહાઉસ હતું અને નજીકમાં એક ઉત્પાદન એકમ હતું. તેમણે કહ્યું, “પ્રથમ નજરે, તે સ્ટોરેજ સુવિધા લાગે છે. ફોરેન્સીક પરીક્ષણથી પુષ્ટિ થશે કે વેરહાઉસમાં સંગ્રહિત સામગ્રી ફટાકડાની હતી કે નહીં.” તેમણે ઉમેર્યું હતું કે માલિક અને જવાબદાર તમામ લોકો સામે કાર્યવાહી કરવામાં આવશે.
આગ ફાટી નીકળતા પહેલા એક સ્થાનિક રહેવાસીએ વિસ્ફોટનો અવાજ સાંભળ્યો હતો, અને સ્થાનિક લોકોએ કામદારોને બચાવવાનો પ્રયાસ કર્યો હતો. તેમણે કહ્યું, “પાણીનું ટેન્કર બોલાવવામાં આવ્યું હતું, અને અમે નળીના પાઈપો સાથે અંદર જવાનો પ્રયાસ કર્યો. અમે ત્રણ કે ચાર લોકોને બચાવવામાં સફળ રહ્યા, જેમને પાછળથી હોસ્પીટલમાં લઈ જવામાં આવ્યા.” વેરહાઉસની બાજુમાં રહેતા અન્ય એક રહેવાસી લિયાકતએ જણાવ્યું હતું કે આગ આખા સંકુલને ઘેરી લે તે પહેલાં તેમણે સિલિન્ડર ફૂટવાની જેમ ધડાકો સાંભળ્યો હતો. તેમણે કહ્યું કે બળી ગયેલા કાટમાળમાંથી ફટાકડાના બ્રાન્ડનું નામ લખેલું એક રેપર મળી આવ્યું હતું, જે દર્શાવે છે કે તેમાં મોટી માત્રામાં વસ્તુઓ હતી.