અરુણાચલ પ્રદેશના ચાંગલાંગ જિલ્લામાં ભારત-મ્યાનમાર સરહદ નજીક શંકાસ્પદ આતંકવાદીઓએ પેટ્રોલિંગ ટીમ પર હુમલો કર્યો. આ હુમલામાં આસામ રાઇફલ્સના એક સૈનિકનું મોત થયું અને અન્ય ચાર ઘાયલ થયા. આ ઘટના સવારે ૬ઃ૩૦ વાગ્યે નામપોંગ સર્કલ હેઠળ નામપોંગ નાલા નજીક બની, જ્યારે ૨૧મી આસામ રાઇફલ્સના સૈનિકો તે વિસ્તારમાં પેટ્રોલિંગ કરી રહ્યા હતા, જ્યાં સરહદ પર વાડનું કામ ચાલી રહ્યું છે.
પ્રારંભિક અહેવાલો અનુસાર, શંકાસ્પદ આતંકવાદીઓએ પેટ્રોલિંગ ટીમ પર ગોળીબાર કર્યો, જેમાં હવાલદાર જાનખોકાઈ કુકી (૪૨)નું મોત થયું અને ચાર અન્ય સૈનિકો ઘાયલ થયા. ઘાયલ સૈનિકોને સારવાર માટે લઈ જવામાં આવી રહ્યા હતા, જ્યારે તેમની સ્થિતિ વિશે માહિતીની રાહ જાવાઈ રહી છે. અધિકારીઓએ જણાવ્યું હતું કે ઘટના બાદ સુરક્ષા દળોએ વિસ્તારમાં કાર્યવાહી તીવ્ર બનાવી છે. પ્રારંભિક અહેવાલો એનએસસીએન સાથે જોડાયેલા આતંકવાદીઓની સંડોવણી સૂચવે છે, જાકે હુમલાખોરોની ઓળખ અંગે કોઈ સત્તાવાર પુષ્ટિ મળી નથી.
ચાંગલાંગ પોલીસ અધિક્ષક કિર્લી પાદુએ જણાવ્યું હતું કે તેમને ઘટનાની જાણ કરવામાં આવી હતી અને તેમણે ચાંગલાંગ પોલીસ સ્ટેશનના ઇન્ચાર્જને માહિતી એકત્રિત કરવા નિર્દેશ આપ્યો હતો. પોલીસ અધિક્ષકે જણાવ્યું હતું કે, “અમને ભારત-મ્યાનમાર સરહદ પર ઘટના વિશે માહિતી મળી છે અને ચાંગલાંગ પોલીસ સ્ટેશનના ઓસીને તેની સંબંધિત માહિતી એકત્રિત કરવા કહ્યું છે.” ચાંગલાંગ જિલ્લામાં ભારત-મ્યાનમાર સરહદ આ વિસ્તારમાં અને આંતરરાષ્ટ્રીય સરહદ પાર સક્રિય આતંકવાદી જૂથોની વારંવાર હિલચાલને કારણે સંવેદનશીલ રહી છે.
અગાઉ, મણિપુરના ચુરાચંદપુર જિલ્લામાં ભારતીય સેના અને આસામ રાઇફલ્સની સંયુક્ત ટીમ સાથેની અથડામણમાં બે યુકેએનએ આતંકવાદીઓ માર્યા ગયા હતા અને બે અન્ય ઘાયલ થયા હતા. સુરક્ષા દળોએ ૨૯ ઓગસ્ટની રાત્રે હેંગલેપ સબ-ડિવિઝનના ફૈબોંગ ગામમાં એક ઓપરેશન શરૂ કર્યું હતું. દળોએ ૨ સપ્ટેમ્બરના રોજ સવારે ૫ વાગ્યે યુકેએનએ કેમ્પ શોધી કાઢ્યો હતો અને કેમ્પ નજીક ઘેરાબંધી શરૂ કરી હતી. યુનાઇટેડ કુકી નેશનલ આર્મી કેન્દ્ર સરકાર, મણિપુર સરકાર અને અનેક કુકી અને ઝોમી સશ† જૂથો દ્વારા હસ્તાક્ષર કરાયેલ ‘સસ્પેન્શન ઓફ ઓપરેશન્સ’ કરારનો ભાગ નથી.