ઇઝરાયલી વડાપ્રધાન બેન્જામિન નેતન્યાહૂએ આ સપ્તાહના અંતે ગુપ્ત રીતે સંયુક્ત આરબ અમીરાત ની મુલાકાત લીધી. આ મુલાકાતનો હેતુ યુએઈના રાષ્ટ્રપતિને એવા અહેવાલોનું ખંડન કરવા કહેવાનો હતો કે તેમણે ૭ ઓક્ટોબર, ૨૦૨૩ ના રોજ દક્ષિણ ઇઝરાયલ પર હમાસના હુમલા વિશે ઇઝરાયલી નેતાને ચેતવણી આપી હતી. ઇઝરાયલી નેતાની મુલાકાતથી પરિચિત બે લોકોએ સોમવારે આ સમાચારની પુષ્ટિ કરી. તેમણે કહ્યું કે નેતન્યાહૂ અને યુએઈના રાષ્ટ્રપતિ શેખ મોહમ્મદ બિન ઝાયેદ અલ નાહ્યાન રવિવારે મળ્યા હતા.
નેતન્યાહૂની મુલાકાતના સમાચાર સૌપ્રથમ ઇઝરાયલના ચેનલ ૧૨ ટીવી સ્ટેશન દ્વારા પ્રકાશિત કરવામાં આવ્યા હતા. આ બાબતથી પરિચિત એક વ્યક્તિએ જણાવ્યું હતું કે ચર્ચાનો મુખ્ય વિષય આ મહિનાની શરૂઆતમાં ઇઝરાયલી અખબાર હારેટ્ઝમાં પ્રકાશિત થયેલ એક અહેવાલ હતો. અહેવાલમાં જણાવાયું છે કે અમીરાતના નેતાએ નેતન્યાહૂને ૭ ઓક્ટોબર, ૨૦૨૩ ના રોજ થયેલા હમાસ હુમલા વિશે ચેતવણી આપી હતી, અને જેના કારણે યુદ્ધ શરૂ થયું હતું. બેઠકની સીધી જાણકારી હોવાનો દાવો કરનાર વ્યક્તિના જણાવ્યા અનુસાર, નેતન્યાહૂએ શેખ મોહમ્મદને આ અહેવાલનું ખંડન કરવા કહ્યું હતું.
નેતન્યાહૂના કાર્યાલયે અગાઉ હારેટ્ઝના અહેવાલને નકારી કાઢ્યો હતો. તે વ્યક્તિ, બેઠકથી પરિચિત એક પ્રાદેશિક અધિકારી સાથે, નામ ન આપવાની શરતે ગુપ્ત મુલાકાત વિશે વાત કરી હતી. યુએઈના વિદેશ મંત્રાલયે બેઠક વિશેના અહેવાલો પર ટિપ્પણી કરવાનો ઇનકાર કર્યો હતો. જા કે, તેણે કહ્યું હતું કે તે ઇઝરાયલ સાથે “ખુલ્લા અને સીધા સંદેશાવ્યવહાર ચેનલો” જાળવી રાખે છે અને “બધી સંબંધિત ગુપ્ત માહિતી” શેર કરે છે. નેતન્યાહૂના કાર્યાલયે તાત્કાલિક કોઈ ટિપ્પણી કરી ન હતી.
૭ ઓક્ટોબર, ૨૦૨૩ ના રોજ, હમાસના આતંકવાદીઓએ ઇઝરાયલ પર ૫,૦૦૦ થી વધુ રોકેટ છોડવાનો દાવો કર્યો હતો. ઇઝરાયલી સૈન્યના જણાવ્યા અનુસાર, તેઓએ ગાઝા પટ્ટીમાં પણ લક્ષ્યોને નિશાન બનાવ્યા હતા. ઇઝરાયલ વિરુદ્ધ હમાસ દ્વારા નવા લશ્કરી કાર્યવાહીની જાહેરાત બાદ, જેરુસલેમમાં સતત ચેતવણીના સાયરન વાગતા રહ્યા. ઇઝરાયલે એન્ટી-રોકેટ સિસ્ટમ તૈનાત કર્યા પછી ઓછામાં ઓછા ત્રણ વિસ્ફોટ સાંભળવામાં આવ્યા હતા.