કેનેડાના મોન્ટ્રીયલ નજીક હેલિકોપ્ટર દુર્ઘટના નોંધાઈ છે. આ હેલિકોપ્ટર દુર્ઘટનામાં ચાર લોકોના મોત થયા છે. અહેવાલો અનુસાર, ક્રેશ પહેલા હેલિકોપ્ટરમાં કેટલીક સમસ્યાઓનો અનુભવ થયો હતો, જાકે કારણ નક્કી કરવા માટે તપાસ ચાલી રહી છે. ક્રેશ પછી હેલિકોપ્ટરમાં આગ લાગી ગઈ. અગ્નિશામકોએ એક કલાકમાં આગ પર કાબુ મેળવ્યો. ક્રેશનું કારણ હાલમાં તપાસ હેઠળ છે. તે ખાનગી વિમાન હોવાનું માનવામાં આવે છે.
પોલીસે શનિવારે કેનેડાના મોન્ટ્રીયલના દક્ષિણપૂર્વમાં એક હેલિકોપ્ટર ક્રેશ થયું હોવાની માહિતી આપી હતી. આ દુર્ઘટનામાં સવાર ચારેય લોકોના મોત થયા હતા. ક્વિબેક પ્રાંતીય પોલીસના પ્રવક્તા એ જણાવ્યું હતું કે મોન્ટ્રીયલથી લગભગ ૫૦ કિલોમીટર (૩૧ માઇલ) દક્ષિણપૂર્વમાં સેન્ટ-બ્રિગાઇડ-ડી’ઇબરવિલે વિસ્તારમાં બપોરે ૨ઃ૩૦ વાગ્યે ક્રેશ થતાં પહેલાં હેલિકોપ્ટરમાં કેટલીક સમસ્યાઓનો અનુભવ થયો હતો.
બિલોડેઉએ જણાવ્યું હતું કે ક્રેશ થયાના એક કલાકમાં અગ્નિશામકોએ આગ બુઝાવી દીધી હતી, પરંતુ તેમાં સવાર ચારેય લોકોને ઘટનાસ્થળે મૃત જાહેર કરવામાં આવ્યા હતા. પ્રાંતીય પોલીસે હજુ સુધી મૃતકોની ઓળખ કરી નથી કે ક્રેશનું કારણ નક્કી કર્યું નથી. પ્રવક્તાએ કહ્યું કે એવું લાગે છે કે હેલિકોપ્ટર ખાનગી વિમાન હતું. કેનેડિયન ટ્રાન્સપોર્ટેશન સેફ્ટી બોર્ડે તપાસકર્તાઓને ક્રેશ સ્થળ પર મોકલ્યા છે.
અગાઉ, યુ.એસ.માં યોસેમાઇટ નેશનલ પાર્કમાં જંગલમાં લાગેલી આગ ઓલવવા માટે પાણી છોડતી વખતે બે હેલિકોપ્ટર ક્રેશ થયા હતા. આ ઘટનામાં બંને હેલિકોપ્ટર પાઇલટનું મૃત્યુ થયું હતું. આ ઘટના રવિવારે બપોરે બની હતી. હેલિકોપ્ટરમાં ફક્ત પાઇલટ્સ જ હતા, અને તેઓ પ્રિસિઝન નામની કોન્ટ્રાક્ટ એરક્રાફ્ટ કંપની માટે કામ કરતા હતા. એજન્સીના પ્રવક્તા એમરી જાહ્ન્સને જણાવ્યું હતું કે પાઇલટ્સમાંના એક ગ્રેગ કિંગ હતા, જે અલાસ્કા ડિપાર્ટમેન્ટ ઓફ ફોરેસ્ટ્રી એન્ડ ફાયર પ્રોટેક્શન માટે કામ કરતા હતા અને પ્રિસિઝનમાં જાડાતા પહેલા તે રાજ્યમાં જંગલની ઘણી આગ ઓલવવામાં સામેલ હતા.