નવસારી શહેરમાં મ્યુનિસિપલ કોર્પોરેશન દ્વારા સંચાલિત ઢોરવાડામાં ઠંડીના કારણે અનેક ગાયોના મોત થયા હોવાની ઘટના સામે આવી છે. મૃત ગાયોના શરીરોને તાત્કાલિક નિકાલ કરવામાં આવ્યો ન હોવાથી ત્યાં આસપાસ વિચરતા શ્ર્વાનોએ તેને ફાડીને ખાઈ લીધા હોવાના દૃશ્યો વાયરલ થયા છે. આ ઘટનાએ ગૌપ્રેમીઓ અને પશુપ્રેમીઓમાં તીવ્ર રોષ ફેલાવ્યો છે, અને તેઓએ મનપા તંત્ર વિરુદ્ધ વિરોધ પ્રદર્શન કર્યું છે. ગૌપ્રેમીઓનું કહેવું છે કે આ ઘટના મનપાની ગંભીર બેદરકારી અને ઢીલી વહીવટી વ્યવસ્થાનું પરિણામ છે.
નવસારીમાં ચાલુ વર્ષની કડકડતી ઠંડીને કારણે શહેરના વિવિધ વિસ્તારોમાંથી પકડાયેલા અને ઢોરવાડામાં રાખવામાં આવેલા પશુઓમાંથી અનેક ગાયોના મોત થયા હતા. સૂત્રો અનુસાર, છેલ્લા એક અઠવાડિયામાં ઢોરવાડામાં લગભગ ૧૦થી વધુ ગાયો અને અન્ય પશુઓના મોત નોંધાયા છે. જોકે, મનપા તંત્ર દ્વારા આ મૃત પશુઓના શરીરોને તાત્કાલિક દફનાવવા અથવા યોગ્ય નિકાલ કરવાની વ્યવસ્થા કરવામાં આવી નહીં.
પરિણામે, ઢોરવાડાની આસપાસ વિચરતા અવારા શ્ર્વાનોએ આ મૃત ગાયોને ફાડીને ખાઈ લીધી હતી.આ ઘટનાની જાણ થતાં જ નવસારીના વિવિધ ગૌપ્રેમી સંગઠનો અને સ્થાનિક નાગરિકોએ ઢોરવાડા પહોંચીને વિરોધ પ્રદર્શન કર્યું. તેઓએ મનપા અધિકારીઓ વિરુદ્ધ સૂત્રોચ્ચાર કર્યા અને તાત્કાલિક કાર્યવાહીની માંગ કરી.