પૂર્વ વડા પ્રધાન ઇમરાન ખાનની પાર્ટી, પાકિસ્તાન તહરીક-એ-ઇન્સાફ અને પાકિસ્તાનમાં શાહબાઝ શરીફ સરકાર વચ્ચેની વાતચીત નિષ્ફળ ગઈ છે. આ પછી,પીટીઆઇએ ઇસ્લામાબાદ તરફની તેની લાંબી કૂચ ચાલુ રાખવાનો નિર્ણય લીધો છે, જેના કારણે પાકિસ્તાનમાં રાજકીય તણાવ વધી રહ્યો છે. સરકારે એમ પણ કહ્યું છે કે તે પ્રદર્શનકારીઓને રાજધાનીમાં પ્રવેશવા દેશે નહીં. રસ્તાઓ પર કન્ટેનર મૂકવા અને સુરક્ષા દળોની તૈનાતી વધારવાની તૈયારીઓ કરવામાં આવી છે.
સરકાર અને પીટીઆઇ વચ્ચે બીજા તબક્કાની વાતચીત શનિવારે સાંજે ૪ વાગ્યે શરૂ થઈ હતી. આખી રાત વાતચીત ચાલુ રહી અને રવિવારે સવારે પૂર્ણ થઈ, પરંતુ બંને પક્ષો કોઈ સમજૂતી પર પહોંચી શક્યા નહીં. પીટીઆઇએ ગયા મહિને ૨૭ સપ્ટેમ્બરે ઇસ્લામાબાદ કૂચની જાહેરાત કરી હતી. સરકારની કડકતાને કારણે, તેને પાછળથી ૪ ઓક્ટોબર સુધી મુલતવી રાખવામાં આવી હતી. હવે, વાતચીત તૂટી ગયા બાદ, પાર્ટીએ વિરોધ પ્રદર્શન આગળ વધારવાનો નિર્ણય લીધો છે.પીટીઆઇની મુખ્ય માંગ ઇમરાન ખાન સાથે તાત્કાલિક મુલાકાત છે. પાર્ટી ઇચ્છે છે કે તેમના અંગત ડાક્ટરને તેમને મળવાની મંજૂરી આપવામાં આવે અને જો જરૂરી હોય તો, તેમને તપાસ માટે હોસ્પિટલમાં લઈ જવામાં આવે.
સરકાર ઇમરાન ખાન સાથે મુલાકાતની માંગ સાથે સીધી રીતે સંમત નહોતી. સરકાર ઇચ્છતી હતી કે પીટીઆઈ પહેલા લોંગ માર્ચ અને વિરોધ પ્રદર્શન રદ કરવાની જાહેરાત કરે, અને તે પછી જ ઇમરાન ખાનને મળવાના મુદ્દા પર નિર્ણય લેવામાં આવે. દરમિયાન, પીટીઆઈએ પહેલા ઇમરાન ખાનને મળવા અને
તેમના અંગત ડાક્ટરને તેમની તપાસ કરવાની મંજૂરી આપવાનો આગ્રહ રાખ્યો. આ સ્થિતિએ બંને પક્ષો વચ્ચે મડાગાંઠ ઉભી કરી. સરકારને એ પણ ચિંતા હતી કે મુલાકાત પછી, ઇમરાન ખાન તેમના સમર્થકોને વિરોધ ચાલુ રાખવા માટે સંદેશ મોકલી શકે છે. જોકે, આ સરકારનું સત્તાવાર કારણ નહોતું. ખૈબર પખ્તુનખ્વામાં આતંકવાદ સામે લડવામાં કેન્દ્ર અને પ્રાંતીય સરકારોની ભૂમિકા પર પણ વાટાઘાટો નિષ્ફળ ગઈ.
ઇમરાન ખાન ૭૩ વર્ષના છે અને ૨૦૨૩ થી જેલમાં છે. ભ્રષ્ટાચારના કેસમાં દોષિત ઠેરવ્યા બાદ તેમની ધરપકડ કરવામાં આવી હતી. તેઓ રાવલપિંડીની ઉચ્ચ સુરક્ષાવાળી આદિયાલા જેલમાં બંધ છે. પીટીઆઈ ઇમરાન ખાન સાથે મુલાકાત અને તેમના અંગત ડાક્ટર દ્વારા આરોગ્ય તપાસની માંગ કરી રહ્યું છે. પાર્ટીએ વિરોધ પ્રદર્શન પહેલા ધરપકડ કરાયેલા ઇમરાન ખાનની બહેનો અને અન્ય લોકોને મુક્ત કરવાની પણ માંગ કરી છે. તેઓ ઇમરાન ખાનની પત્ની બુશરા બીબીની યોગ્ય તબીબી તપાસ અને દખલ વિના તેમના કેસની ન્યાયી સુનાવણીની પણ માંગ કરે છે.
ખૈબર પખ્તુનખ્વાના મુખ્યમંત્રી સોહેલ આફ્રિદીએ ૧૨ઃ૪૬ વાગ્યે વિરોધ પ્રદર્શન ચાલુ રાખવાની જાહેરાત કરી. તેમના મતે, રવિવારે બપોરે ૧ વાગ્યે લક્કી મારવતના ગાંડી ચોકથી કૂચ શરૂ થઈ હતી. ટાંક, ડેરા ઇસ્માઇલ ખાન, દક્ષિણ વઝીરિસ્તાન, ઉત્તર વઝીરિસ્તાન, બન્નુ અને લક્કી મારવતના સમર્થકો ભાગ લેશે. ત્યારબાદ કાફલો કરક નજીક રાતોરાત રોકાશે અને બીજા દિવસે કોહાટ જશે. ૬ ઓક્ટોબરે કોહાટ, હંગુ, કુર્રમ અને ઓરકઝાઈના લોકો જાડાશે. ત્યારબાદ કૂચ પેશાવર જશે.
પીટીઆઈના જણાવ્યા અનુસાર, આ કાફલો ૭ ઓક્ટોબરે પેશાવરના બુધ બૈરથી આગળ વધશે. પેશાવરના અન્ય વિસ્તારોના લોકો કોહાટ રોડ બ્રિજ અને મોટરવે ટોલ પ્લાઝા નજીક કૂચમાં જોડાશે. ચારસદ્દા ઇન્ટરચેન્જ નજીક રાત્રિ રોકાણનું આયોજન કરવામાં આવ્યું છે.