ઉત્તર કોરિયાના નેતા કિમ જાંગ-ઉન કોમામાં છે અને તેમને સારવાર માટે બેઇજિંગ લઈ જવામાં આવ્યા છે તેવી નવી ઓનલાઈન અફવાઓ વચ્ચે, ઉત્તર કોરિયાના નેતા કિમ જાંગ-ઉન સોમવાર, ૧૯ ઓક્ટોબરના રોજ કપડાં અને જૂતાના પ્રદર્શનમાં તેમની પુત્રી સાથે જોવા મળ્યા હતા, ઉત્તર કોરિયાની રાજ્ય સમાચાર એજન્સી, કોરિયન સેન્ટ્રલ ન્યૂઝ એજન્સીના અહેવાલ મુજબ. તાજેતરમાં પ્રકાશિત થયેલા ફોટામાં તેઓ કપડાં અને જૂતાના પ્રદર્શનમાં દેખાય છે. સોશિયલ મીડિયા પર ફેલાતી અફવાઓથી અસંખ્ય અપ્રમાણિત દાવાઓ થયા છે કે કિમ જાંગ-ઉનને મગજમાં રક્તસ્ત્રવ થયો છે, કોમામાં છે, અથવા તેમનું મૃત્યુ થયું છે.
કેસીએનએએ અહેવાલ આપ્યો છે કે કિમે સોમવારે સંરક્ષણ સંગ્રહાલયમાં એક પ્રદર્શનની મુલાકાત લીધી હતી અને ઉત્તર કોરિયાના કાપડ અને જૂતા ઉદ્યોગોના વિકાસની પ્રશંસા કરી હતી. પ્રદર્શનમાં ૭૦,૭૦૦ થી વધુ કપડાં અને ૧૭૦,૦૦૦ થી વધુ જોડી જૂતાનો સમાવેશ થાય છે. આ ઉત્પાદનો દેશભરના કારખાનાઓમાં બનાવવામાં આવ્યા હતા, જે કિમની પ્રાદેશિક વિકાસ નીતિનો ભાગ છે, જેનો હેતુ મુખ્ય શહેરી કેન્દ્રોની બહાર ઉત્પાદન અને જીવનધોરણ સુધારવાનો છે.
કિમના સ્વાસ્થ્ય અંગે સોશિયલ મીડિયા પર ઘણી પોસ્ટ્સમાં દાવો કરવામાં આવ્યો હતો કે તેમને મગજમાં ગંભીર રક્તસ્રાવ થયો હતો, તેઓ કોમામાં સરી પડ્યા હતા અને તેમને તાત્કાલિક સારવાર માટે બેઇજિંગ લઈ જવામાં આવ્યા હતા.
કેટલીક ઓનલાઈન પોસ્ટ્સમાં એવો પ્રશ્ન પણ ઉઠાવવામાં આવ્યો હતો કે જા કિમનું મૃત્યુ થાય તો તેમનું સ્થાન કોણ લેશે. ભવિષ્યમાં નેતૃત્વમાં ફેરફાર થાય તો તેમની પુત્રી અને બહેન કિમ
યો જાંગનો ઉલ્લેખ સંભવિત ઉત્તરાધિકારી તરીકે કરવામાં આવ્યો હતો.
કેટલીક પોસ્ટ્સમાં એવું પણ કહેવામાં આવ્યું હતું કે પ્યોંગયાંગમાં મર્યાદિત તબીબી સુવિધાઓને કારણે કિમને બેઇજિંગની એક હોસ્પિટલમાં લઈ જવામાં આવ્યા હતા. કેટલાકે ઉત્તર કોરિયામાં સંભવિત સત્તા સંઘર્ષ વિશે પણ અનુમાન લગાવ્યું હતું. જા કે, આ દાવાઓને સમર્થન આપવા માટે કોઈ નક્કર પુરાવા મળ્યા નથી.
કિમના સ્વાસ્થ્ય વિશે આ પહેલીવાર અફવાઓ સામે આવી નથી. ઉત્તર કોરિયાની ગુપ્તતાને ધ્યાનમાં રાખીને, જાહેર દૃષ્ટિકોણથી ટૂંકી ગેરહાજરી પણ તેમના સ્વાસ્થ્ય અને તેમના ઉત્તરાધિકારી વિશે અટકળો તરફ દોરી શકે છે. વિદેશી સરકારો અને ગુપ્તચર એજન્સીઓ તેમના પર નજીકથી નજર રાખે છે, કારણ કે ઉત્તર કોરિયાના નેતૃત્વમાં કોઈપણ ફેરફાર સમગ્ર ક્ષેત્રની સુરક્ષાને અસર કરી શકે છે.
આ અટકળો વચ્ચે, તેમના સંભવિત ઉત્તરાધિકારીઓની આસપાસ પણ ચર્ચાઓ શરૂ થઈ ગઈ છે, જેમાં તેમની પ્રભાવશાળી બહેન કિમ યો-જાંગ અને તેમની પુત્રી કિમ જુ-એનો સમાવેશ થાય છે, જેઓ અનેક મહત્વપૂર્ણ પ્રસંગોએ તેમની સાથે જોવા મળ્યા છે. કોઈ સત્તાવાર ઉત્તરાધિકાર યોજના વિના, ઉત્તર કોરિયાનું નેતૃત્વ તીવ્ર અટકળોનો વિષય રહે છે.