જો યુએસ રાષ્ટ્રપતિ ડોનાલ્ડ ટ્રમ્પનું માનવું હોય, તો પેરિસ ટૂંક સમયમાં મુસ્લીમ શહેર બનશે. તેમણે આ માટે ફ્રાન્સની ઇમિગ્રેશન નીતિઓને જવાબદાર ઠેરવી. ડોનાલ્ડ ટ્રમ્પે એવો પણ દાવો કર્યો હતો કે જો ફ્રાન્સના રાષ્ટ્રપતિ ઇમેન્યુઅલ મેક્રોન ઇમિગ્રેશન અંગેની તેમની સલાહનું પાલન કર્યું હોત, તો આવી હિંસા અને અશાંતિ ટાળી શકાઈ હોત.
વ્હાઇટ હાઉસની બહાર પત્રકારો સાથે વાત કરતા, ડોનાલ્ડ ટ્રમ્પે કહ્યું, “પેરિસ ખૂબ જ ટૂંક સમયમાં મુસ્લીમ શહેર બનવા જઈ રહ્યું છે, અને તે સોદો નહોતો.” ટ્રમ્પે આરોપ લગાવ્યો હતો કે ઇમિગ્રન્ટ્સના ધસારાએ ફ્રાન્સની રાજધાનીની વસ્તીમાં નોંધપાત્ર ફેરફાર કર્યો છે. ટ્રમ્પે કહ્યું કે તેમણે ઘણા વર્ષો પહેલા મેક્રોનને ફ્રાન્સમાં મોટી સંખ્યામાં ઇમિગ્રન્ટ્સને પ્રવેશ આપવા સામે ચેતવણી આપી હતી.
ટ્રમ્પે કહ્યું, “તે મારો મિત્ર છે. મેં તેમને ઘણા સમય પહેલા કહ્યું હતું કે તમે ફ્રાન્સમાં મોટી ભૂલ કરી રહ્યા છો. તમે દુનિયાભરના દરેકને તમારા દેશમાં પ્રવેશવા આપી રહ્યા છો. દુનિયાભરના લોકો ત્યાં આવી રહ્યા હતા. અને જેમ તમે જાણો છો, પેરિસ ખૂબ જ ટૂંક સમયમાં મુસ્લીમ શહેર બનવા જઈ રહ્યું છે. તેના પર કોઈ કરાર થયો ન હતો. તેના પર સંમતિ થઈ ન હતી.”
ટ્રમ્પનું નિવેદન ત્યારે આવ્યું છે જ્યારે પેરિસ, લીલી, નાઇસ અને અન્ય શહેરોમાં રમખાણો, લૂંટફાટ અને વિરોધીઓ અને પોલીસ વચ્ચે અથડામણો બાદ સ્થાનિક કર્ફ્યુ લાદવામાં આવ્યો છે અને જાહેર મેળાવડા પર પ્રતિબંધ મૂકવામાં આવ્યો છે. આગામી રાષ્ટ્રપતિની ચૂંટણી પહેલા સુરક્ષા નિષ્ફળતાઓ, વ્યવસાયિક નુકસાન અને વધતા જતા જાહેર ગુસ્સાને કારણે અશાંતિએ વડા પ્રધાન સેબેસ્ટીયન લેકોર્નુની સરકાર પર દબાણ વધાર્યું છે.
ફ્રાન્સના વડા પ્રધાન સેબેસ્ટીયન લેકોર્નુએ વધતી જતી મોંઘવારી સામેના વિરોધ પ્રદર્શનો દરમિયાન હિંસા બાદ શહેરોમાં રમખાણો અને લૂંટફાટ અટકાવવા માટે ખૂબ જ મર્યાદિત અને ચોક્કસ કર્ફ્યુનો આદેશ આપ્યો છે. ગૃહમંત્રી લોરેન્ટ નુનેઝે અગાઉ રવિવારે રાજીનામું આપવાની ઓફર કરી હતી, પરંતુ રાષ્ટ્રપતિ ઇમેન્યુઅલ મેક્રોને તેમને કટોકટી દરમિયાન પોલીસની જરૂરિયાતો પૂરી કરવા માટે પદ પર રહેવા કહ્યું હતું.
મેક્રોને જારી કરેલા એક નિવેદનમાં જણાવ્યું હતું કે વર્તમાન પરિસ્થિતિમાં કાયદા અમલીકરણ એજન્સીઓનું સતત નેતૃત્વ જરૂરી છે, તેથી જ તેમણે લોરેન્ટ નુનેઝનું રાજીનામું સ્વીકાર્યું નથી. નિવેદન અનુસાર, મેક્રોને નુનેઝને હિંસાના આયોજન અને ગુપ્ત માહિતી એકત્રિત કરવામાં નિષ્ફળતાઓ અંગે સંપૂર્ણ પારદર્શિતા સુનિશ્ચિત કરવા માટે તમામ જરૂરી પગલાં લેવા સૂચના આપી હતી. હિંસાને રોકવા માટે મેક્રોને શક્્ય તેટલી વહેલી તકે નવી પોલીસ વ્યૂહરચનાઓનો અમલ કરવાનો પણ નિર્દેશ આપ્યો હતો.
ફ્રાન્સમાં તોફાનીઓ સામે કડક કાર્યવાહી શરૂ થઈ ગઈ છે. પોલીસે અત્યાર સુધીમાં ૨,૫૦૦ થી વધુ લોકોની ધરપકડ કરી છે. દરમિયાન, ફ્રાન્સના રાષ્ટ્રપતિ ઇમેન્યુઅલ મેક્રોને કડક વલણ અપનાવતા કહ્યું કે જેમણે તોડફોડ અને વિનાશ કર્યો છે તેમને તેની કિંમત ચૂકવવી પડશે.