કતાર એરવેઝની ફ્લાઇટમાં આજે અમદાવાદ આવેલા એક મુસાફર પાસેથી અંદાજે 66 લાખનું સોનુ પકડાયું છે.મુસાફર ગોધરાનો રહેવાસી છે. મુસાફરની તલાશી લેવાતા શરીરના મળાશયમાંથી 422 ગ્રામ ગોલ્ડ પેસ્ટ મળી આવી હતી. આ મુસાફર દાણચોરી કરીને કોના માટે સોનુ લાવ્યો હતો તે બદલ તેને કેટલી રકમ ચૂકવવામાં આવી હતી તે દિશામાં કસ્ટમ વિભાગે તપાસ હાથ ધરી છે.
મુસાફર જેદાહથી અમદાવાદ આવ્યો હતો
પેસેન્જરની પ્રોફાઇલિંગના આધારે કસ્ટમ્સ અમદાવાદના એર ઇન્ટેલિજન્સ યુનિટ (AIU) ના અધિકારીઓએ કતાર એરવેઝની ફ્લાઇટ નંબર QR-534 દ્વારા દોહા થઈને જેદ્દાહથી અમદાવાદ આવેલા એક યુવાન મુસાફર સરફરાઝ માલા (ગુજરાતના ગોધરાના રહેવાસી, 24 વર્ષીય)ને અટકાવ્યા હતા.
તપાસ દરમિયાન, આ મુસાફરના શરીરના મળાશયમાં 467.09 ગ્રામ સોનાની પેસ્ટ છુપાવેલી હોવાનું જણાયું હતું. ત્યારબાદ મળી આવેલી સોનાની પેસ્ટને 24 કેરેટ શુદ્ધતાના સોનાના બારમાં રૂપાંતરિત કરવામાં આવી હતી, જેનું વજન 422.83 ગ્રામ હોવાનું જાણવા મળ્યું હતું. તેની બજાર કિંમત Rs. 65, 69, 087 હતું.
સોનાની દાણચોરી માટે આરોપીને 12,000 રૂપિયા મળ્યા હતા
કસ્ટમ્સ એક્ટ, 1962ની જોગવાઈઓ હેઠળ આ સોનાનો બાર જપ્ત કરવામાં આવ્યો હતો. કસ્ટમ્સ એક્ટ, 1962ની સંબંધિત જોગવાઈઓ હેઠળ મુસાફર સરફરાઝ માલાની ધરપકડ કરીને પ્રાથમિક તપાસમાં તેને ગોધરાના અલ્તાફે 12,000 રૂપિયા આપ્યા હતા. છતાં તે અગાઉ હૈદરાબાદ અને મુંબઈથી ગયો હતો પણ પહેલી વખત તે સોનું લઈને આવ્યો અને પકડાયો હોવાનું જણાવ્યું છે. છતાં કસ્ટમ વિભાગે વધુ ઝીણવટભરી તપાસ હાથ ધરી છે.