બ્રાઝિલમાં આવેલા એક શક્તિશાળી વાવાઝોડાએ રિયો ગ્રાન્ડે ડો સુલના ગુઆઇબા શહેરમાં એવું સ્વરૂપ બતાવ્યું કે બધા આશ્ચર્યચકિત થઈ ગયા. અહીં પવને રૌદ્ર સ્વરૂપ ધારણ કર્યું અને અમેરિકાની તર્જ પર બનેલી સ્ટેચ્યુ ઓફ લિબર્ટીની 24 મીટર લાંબી પ્રતિકૃતિ (રેપ્લિકા) એક હવન મેગાસ્ટોરની બહાર ધરાશાયી થઈ ગઈ. આ ચોંકાવનારી ક્ષણને ઘણા લોકોએ પોતાના ફોનમાં વીડિયોના રૂપમાં કેદ કરી, જે ઝડપથી સોશિયલ મીડિયા પર વાયરલ થઈ રહ્યો છે. આ વાયરલ વીડિયોમાં સ્પષ્ટ દેખાઈ રહ્યું છે કે ‘સ્ટેચ્યુ ઓફ લિબર્ટી’નું આ વિશાળ સ્ટેચ્યુ એક ખાલી પાર્કિંગ પ્લેસમાં ધીમે ધીમે આગળની તરફ ઝૂકતી દેખાય છે અને અંતે જમીન પર પડી જાય છે.
હવે તમારા મનમાં પણ વિચાર આવતો હશે કે આખરે પવન કઈ ગતિથી ફૂંકાઈ રહ્યો હતો કે તેણે આટલી વિશાળ પ્રતિમાને પણ પાડી દીધી. બ્રાઝિલની નાગરિક સુરક્ષા એજન્સી, ડેફેસા સિવિલ અનુસાર, મેટ્રોપોલિટન વિસ્તારમાં ગંભીર હવામાનની ચેતવણી જારી કરવામાં આવી હતી અને અહીં પવનની ગતિ 90 કિમી/કલાકથી વધુ થઈ ગઈ હતી.
આ પ્રતિમાને 2020માં સ્થાપિત કરવામાં આવી હતી અને ઇજનેરો દ્વારા પ્રમાણિત કરવામાં આવી હતી. આ પ્રતિમા 11 મીટરના કોંક્રિટ બેઝ પર બનાવવામાં આવી છે. પ્રતિમા પડ્યા પછી પણ આ કોંક્રિટ બેઝ અકબંધ રહ્યો. સારી વાત એ રહી કે પ્રતિમા ધરાશાયી થવાના થોડા સમય પહેલા જ ત્યાં આસપાસથી વાહનો અને લોકોને હટાવી દેવામાં આવ્યા હતા. આ જ કારણોસર, પ્રતિમા પડવાથી જાનમાલને કોઈ અન્ય નુકસાન થયું નથી.
મીડિયા રિપોર્ટ અનુસાર, ગુઆઇબાના મેયર માર્સેલો મારાનાટાએ ઘટનાની ઓનલાઈન પુષ્ટિ કરી છે. તેમણે જણાવ્યું કે પવન 80 થી 90 કિમી/કલાકની ઝડપની નજીક પહોંચી ગયો હતો.