ચેક રિપબ્લીકના નાયબ વડા પ્રધાન અને ઉદ્યોગ અને વેપાર પ્રધાન કારેલ હાવલીચેક ભારતની ચાર દિવસની મુલાકાતે છે. તેમની મુલાકાતના બીજા દિવસે, તેમણે નવી દિલ્હીમાં કેન્દ્રીય સંરક્ષણ પ્રધાન રાજનાથ સિંહ સાથે દ્વિપક્ષીય બેઠક યોજી. આ બેઠક દરમિયાન, બંને પક્ષો સંરક્ષણ ઉદ્યોગમાં સહયોગ વધારવા સંમત થયા અને બંને દેશો વચ્ચે સ્થાપિત સંયુક્ત સાહસોની પ્રગતિ પર સંતોષ વ્યક્ત કર્યો.
આ ભાગીદારીનો મુખ્ય ઉદ્દેશ “મેક ઇન ઇન્ડિયા” અને “આત્મનિર્ભર ભારત” અભિયાનોને પ્રોત્સાહન આપવાનો છે. બંને નેતાઓએ પ્રાદેશિક શાંતિ અને સુરક્ષા જાળવવા માટે પરસ્પર સહયોગ વધારવાની જરૂરિયાત પર પણ ભાર મૂક્યો. તેમણે પુનરોચ્ચાર કર્યો કે ભારત અને ચેક રિપબ્લીક વચ્ચેની ભાગીદારી ઐતિહાસિક અને સાંસ્કૃતિક સંબંધો અને પરસ્પર વિશ્વાસ અને આદરના સહિયારા મૂલ્યો પર આધારિત છે. બેઠક પછી સંરક્ષણ પ્રધાન રાજનાથ સિંહે ‘x’ પર લખ્યું, “આજે નવી દિલ્હીમાં ચેક રિપબ્લીકના નાયબ વડા પ્રધાન કારેલ હાવલિસેક સાથે ઉત્તમ મુલાકાત થઈ. અમે સંરક્ષણ ઔદ્યોગિક સહયોગના સમગ્ર સ્પેક્ટ્રમની સમીક્ષા કરી અને વિવિધ સંયુક્ત સાહસોની પ્રગતિ અને સફળતા જાઈને ખુશ થયા. આત્મનિર્ભર ભારતને પ્રોત્સાહન આપવા માટે અમે ભારત-ચેક સંયુક્ત સંરક્ષણ સમિતિ હેઠળ આ સહયોગને વધુ વિસ્તૃત કરવા માટે પણ સંમત થયા.”
ચેક રિપબ્લીકના નાયબ વડા પ્રધાન અને ઉદ્યોગ અને વેપાર પ્રધાન, કારેલ હાવલિસેક, ૧૨ ઓક્ટોબર, ૨૦૨૬ થી ૧૫ ઓક્ટોબર, ૨૦૨૬ સુધી ભારતની સત્તાવાર મુલાકાતે છે. આ સમયગાળા દરમિયાન, તેઓ અનેક મંત્રાલયો, વ્યાપારી સંગઠનો અને ઉદ્યોગના પ્રતિનિધિઓ સાથે મુલાકાત કરશે. તેઓ બેંગલુરુ અને મુંબઈમાં ઔદ્યોગિક કેન્દ્રોની મુલાકાત પણ લેશે.
અગાઉ, ૧૨ ઓક્ટોબરના રોજ, તેમણે નાગરિક ઉડ્ડયન મંત્રી રામ મોહન નાયડુ અને માર્ગ પરિવહન અને રાજમાર્ગ મંત્રી નીતિન ગડકરી સાથે મુલાકાત કરી હતી. બેઠક દરમિયાન, પ્રાદેશિક હવાઈ જોડાણ માટે ‘મેડ ઇન ઇન્ડિયા’ વિમાનોના ઉત્પાદનમાં ભાગીદારીની શક્્યતાઓ તેમજ ટકાઉ માળખાગત સુવિધાઓ, ગ્રીન મોબિલિટી, ઉર્જા સંક્રમણ અને ટેકનોલોજીકલ સહયોગ વધારવા પર ચર્ચા કરવામાં આવી હતી.