હરિયાણાના ગુરુગ્રામના સોહના વિસ્તારમાં આજે વહેલી સવારે પોલીસ અને ગુનેગારો વચ્ચે એન્કાઉન્ટર થયું. પોલીસના જણાવ્યા અનુસાર, નુહ ક્રાઈમ બ્રાન્ચની એક ટીમે થાર વાહનમાં બે ગાયો લઈ જઈ રહેલા ત્રણ ગુનેગારોને ઘેરવાનો પ્રયાસ કર્યો. તે સમયે ફાયરિંગ શરૂ થયું. ત્યારબાદ થયેલી ગોળીબારમાં, વોન્ટેડ ગુનેગાર શાહિદ ઉર્ફે અડવાણી ઘાયલ થઈ ગયો અને તેનું મોત થયું, જ્યારે તેના બે સાથીઓ અંધારાનો લાભ લઈને ભાગી ગયા. પોલીસે ગાયોને ઘટનાસ્થળેથી બચાવી અને તેમને ગૌશાળામાં મોકલી દીધા.
આ ઘટના ગુરુગ્રામ-નુહ સરહદ પર સિલાની રોડ પર, સોહનાના ભીવરાવતી ગામ નજીક બની હતી. પોલીસના જણાવ્યા અનુસાર, નુહ ક્રાઈમ બ્રાન્ચને સવારે લગભગ ૪ વાગ્યે માહિતી મળી હતી કે શાહિદ ઉર્ફે અડવાણી અને તેના સાથીઓ ગાયની તસ્કરી માટે જવાના છે. માહિતીના આધારે, ટીમે શોધખોળ શરૂ કરી. થોડીવાર પછી, ફરીદાબાદ નોંધણી નંબરવાળી થાર વાહન જાવા મળી, જેમાં ત્રણ લોકો અને બે ગાયો ટ્રંકમાં હતી. પોલીસ ટીમે તેને રોકવા માટે વાહનને ઘેરી લીધું, પરંતુ ગુનેગારોએ ગોળીબાર કર્યો. જવાબી ગોળીબારમાં સાજિદને ગોળી વાગી, તેનું ઘટનાસ્થળે જ મોત થયું, જ્યારે અન્ય બે આરોપીઓ ભાગી ગયા.
એનકાઉન્ટર બાદ, સોહના સદર પોલીસ સ્ટેશન, ફોરેન્સિક ટીમ અને ક્રાઈમ ટીમ ઘટનાસ્થળે પહોંચી. પોલીસે મૃતદેહનો કબજા મેળવીને તેને પોસ્ટમોર્ટમ માટે સોહના સિવિલ હોસ્પીટલમાં મોકલી આપ્યો હતો. એક પશુચિકિત્સક ડાક્ટરને પણ ઘટનાસ્થળે બોલાવવામાં આવ્યા હતા. તપાસ બાદ, થાર વાહનમાંથી મળી આવેલી બે ગાયોને મુક્ત કરીને ગૌશાળામાં મોકલી દેવામાં આવી હતી. પોલીસ હવે ફરાર આરોપીની શોધ કરી રહી છે અને ઘટનાસ્થળેથી પુરાવા એકત્રિત કરીને સમગ્ર કેસની તપાસ કરી રહી છે.
પોલીસના જણાવ્યા અનુસાર, શાહિદ ઉર્ફે અડવાણી લાંબા સમયથી વોન્ટેડ હતો અને લગભગ ૩૦ ગુનાહિત કેસોમાં તેનું નામ નોંધાયેલું છે. એટીએમ ચોરી અને લૂંટ સંબંધિત કેસોમાં પણ તેનું નામ હતું. ૨૦૧૮ માં, બિલાસપુર ક્રાઈમ બ્રાન્ચે એન્કાઉન્ટર પછી તેની ધરપકડ કરી હતી. તેને ઈજાઓ સાથે હોસ્પીટલમાં દાખલ કરવામાં આવ્યો હતો. પોલીસના જણાવ્યા અનુસાર, સારવાર બાદ પૂછપરછ માટે રિમાન્ડ પર લેવામાં આવતા તે પોલીસ કસ્ટડીમાંથી ભાગી ગયો હતો. ત્યારથી તેની શોધખોળ ચાલી રહી છે. હવે સોહના વિસ્તારમાં એન્કાઉન્ટરમાં તેનું મોત થયું છે. પોલીસ ફરાર શકમંદો શોધી રહી છે અને કેસના અન્ય પાસાઓની તપાસ કરી રહી છે.