રાષ્ટ્રપતિ પુતિનની ભારત મુલાકાત પહેલા, કોંગ્રેસ સાંસદ રાહુલ ગાંધીએ કેન્દ્ર સરકાર પર વિદેશી મહેમાનોને વિપક્ષના નેતાને મળવા ન દેવાનો આરોપ લગાવ્યો છે. ભાજપે હવે રાહુલ ગાંધીના આરોપ પર નિશાન સાયું છે. ભાજપના સાંસદ સંબિત પાત્રાએ કહ્યું છે કે રાહુલ ગાંધીએ વિપક્ષના નેતા તરીકે આપેલા નિવેદનો બેજવાબદાર છે અને તેમના દાવાઓ તથ્યો પર આધારિત નથી.
ગુરુવારે સંસદ સત્ર પછી મીડિયા સાથે વાત કરતા ભાજપના સાંસદ સંબિત પાત્રાએ કહ્યું કે લોક્સભામાં વિપક્ષના નેતા તરીકે રાહુલ ગાંધીએ આપેલા નિવેદનો બેજવાબદાર છે અને તથ્યો પર આધારિત નથી. પ્રથમ, તેમણે કહ્યું કે આંતરરાષ્ટ્રીય મહાનુભાવોને વિપક્ષના નેતાને મળવાની મંજૂરી નથી કારણ કે ભારત સરકાર અસુરક્ષિત અનુભવે છે. ભારત સરકાર રાહુલ ગાંધીથી અસુરક્ષિત કેમ અનુભવશે? આજે, ભારત વૈશ્ર્વિક અર્થતંત્રનો આધારસ્તંભ બની ગયું છે. બીજું, તેમણે કહ્યું કે જ્યારે પણ તેઓ વિદેશ પ્રવાસ કરે છે, ત્યારે અમારી સરકાર તે દેશોના નેતાઓને તેમને ન મળવા વિનંતી કરે છે. આવા નિવેદનો કરવા બેજવાબદાર છે.
રાહુલ ગાંધીના આરોપ પર પ્રતિક્રિયા આપતા, ભાજપના સાંસદ અપરાજિતા સારંગીએ કહ્યું, આનાથી વધુ હાસ્યાસ્પદ કંઈ હોઈ શકે નહીં. તેમણે આરોપો અને પ્રતિ-આરોપોના રાજકારણથી ઉપર ઉઠીને લોકો માટે કામ કરવું જોઈએ… રશિયન રાષ્ટ્રપતિ ભારત આવી રહ્યા છે, તેથી વિપક્ષી નેતાએ તેમનું સ્વાગત કરવું જોઈએ અને આવી નકારાત્મક વિચારસરણી સાથે બધાની સામે ન આવવું જોઈએ. આપણી સરકારમાં બધા માટે આદર અને સમાનતાની ભાવના છે… વિપક્ષી નેતાએ ગૌરવ સાથે વર્તવું જોઈએ.
ભાજપના સાંસદ નરહરિ અમીને કહ્યું, રાહુલ ગાંધીએ પોતે વિચારવું જોઈએ કે તેઓ વિદેશમાં જઈને ભારત વિશે ખરાબ કેવી રીતે બોલી શકે છે. રાજકીય મુદ્દાઓ પર ભારતમાં ચર્ચા થવી જોઈએ, પરંતુ જ્યારે તેઓ વિદેશ જાય છે, ત્યારે તેઓ ભારત સરકાર અને દેશ વિશે ખરાબ બોલે છે. સરકાર તેમને અથવા કોઈપણ વિપક્ષી પક્ષના સભ્યને તેમના વર્તનને કારણે કેમ રોકશે? જો તેઓ તેમના વર્તનમાં સુધારો કરે, તો કોઈ પ્રશ્ર્ન ન રહે. કોંગ્રેસના સમયમાં, એવા વિપક્ષી સભ્યો હતા જેઓ સરકારનો પક્ષ લેતા હતા.