પાકિસ્તાનમાં ફરી એકવાર પૂર્વ વડા પ્રધાન ઇમરાન ખાનની મુક્તિ માટે મોટા પાયે વિરોધ પ્રદર્શનો ફાટી નીકળ્યા છે. ઇમરાન ખાનની પાર્ટી, પાકિસ્તાન તહરીક-એ-ઇન્સાફ દ્વારા ખૈબર પખ્તુનખ્વાથી ઇસ્લામાબાદ તરફ એક મોટી કૂચ શરૂ કરવામાં આવી છે. સરકાર સાથેની વાટાઘાટો નિષ્ફળ ગયા બાદ આ કૂચ શરૂ કરવામાં આવી છે. દરમિયાન, ઇસ્લામાબાદમાં કલમ ૧૪૪ લાગુ કરવામાં આવી છે. ઇસ્લામાબાદમાં કોઈને પ્રવેશવાની મંજૂરી આપવામાં આવશે નહીં. આસીમ મુનીરનો તણાવ વધી રહ્યો છે. પ્રશ્ન એ છે કે શું કૂચ ઇસ્લામાબાદ પહોંચશે, કે સરકાર તેને અધવચ્ચે જ રોકી દેશે?
અગાઉ, સરકારી વાટાઘાટકારો અને ઇમરાન ખાનની પાર્ટીના નેતાઓ વચ્ચે વાતચીતનો બીજા રાઉન્ડ શનિવારે સાંજે ૪ વાગ્યે શરૂ થયો હતો અને આખી રાત ચાલુ રહ્યો. આ વાટાઘાટો રવિવારે વહેલી સવારે કોઈ સમજૂતી વિના સમાપ્ત થઈ.પીટીઆઇ સમર્થકોએ ખૈબર પખ્તુનખ્વાના લક્કી મારવતથી લાંબી કૂચ શરૂ કરી. મોટી સંખ્યામાં પીટીઆઇ સમર્થકો ગાંધી ચોક પર ભેગા થયા અને રવિવાર, ૪ ઓક્ટોબરથી શરૂ થયેલી કૂચમાં જાડાયા. હજારો લોકો લગભગ ૨૭૫ કિમી દૂર ઇસ્લામાબાદ તરફ કૂચ કરી રહ્યા છે. ઇમરાન ખાનની પાર્ટી, પીટીઆઈના કાર્યકરો પર ભારે કાર્યવાહી કરવામાં આવી છે. પીટીઆઈનો દાવો છે કે તેના આશરે ૨,૦૦૦ કાર્યકરોની ધરપકડ કરવામાં આવી છે. દરમિયાન, ઇસ્લામાબાદમાં સંસદ અને હાઇવેની આસપાસ સુરક્ષા વધારી દેવામાં આવી છે, જેમાં ઘણા રસ્તાઓ કન્ટેનરથી બંધ કરવામાં આવ્યા છે.
પાકિસ્તાન તહરીક-એ-ઇન્સાફ (પીટીઆઈ) એ ગયા મહિને ૨૭ સપ્ટેમ્બરના રોજ ઇસ્લામાબાદ તરફ કૂચની જાહેરાત કરી હતી, પરંતુ બાદમાં શાહબાઝ સરકાર દ્વારા વિરોધ પ્રદર્શનોને કાબુમાં લેવા માટે કડક પગલાં લેવાને કારણે તેને ૪ ઓક્ટોબર સુધી મુલતવી રાખવામાં આવી હતી. આનાથી પાકિસ્તાન સરકાર પર વધારાનો નાણાકીય બોજ પણ પડ્યો છે. પીટીઆઈના નેતાઓ માંગ કરી રહ્યા છે કે તેમને જેલમાં ઇમરાન ખાનને મળવાની મંજૂરી આપવામાં આવે અને એક ખાનગી ડાક્ટરને તેમની તપાસ કરવાની મંજૂરી આપવામાં આવે.
૭૩ વર્ષીય ભૂતપૂર્વ ક્રિકેટરમાંથી રાજકારણી બનેલા ઈમરાન ખાન ૨૦૨૩ થી જેલમાં છે. તેમના પર ભ્રષ્ટાચાર અને હિંસા ભડકાવવા સહિતના ૧૦૦ થી વધુ કેસોનો સામનો છે. તેઓ રાવલપિંડીની આદિયાલા જેલમાં બંધ છે. ૧૮ ઓગસ્ટના રોજ, પાકિસ્તાનની સુપ્રીમ કોર્ટે તેમના સ્વાસ્થ્ય, ખાસ કરીને તેમની દૃષ્ટિ અંગે ચિંતા વ્યક્ત કર્યા બાદ તેમને તપાસ અને સારવાર માટે ઇસ્લામાબાદની એક ખાનગી હોÂસ્પટલમાં ટ્રાન્સફર કરવાનો આદેશ આપ્યો. સરકારે આ આદેશને પડકાર્યો અને બાદમાં સમીક્ષા અરજી દાખલ કરી.