જામનગર જિલ્લાના જાડિયા તાલુકાના વાવડી ગામે વીજલાઇન મુદ્દે ચાલી રહેલા કિસાન સત્યાગ્રહ દરમિયાન એક ઉપવાસી ખેડૂતની તબિયત લથડતાં ચિંતા પ્રસરી છે. મંદિર પરથી પસાર થતી વીજલાઇનના વિરોધમાં અન્નત્યાગ સત્યાગ્રહ પર બેઠેલા નીરા મહારાજની બીજા દિવસે અચાનક તબિયત બગડી હતી. સ્થિતિને ધ્યાનમાં રાખીને તેમને તાત્કાલિક ૧૦૮ એમ્બ્યુલન્સ મારફતે જાડિયાની સરકારી હોસ્પિટલમાં ખસેડવામાં આવ્યા હતા.
મળતી માહિતી મુજબ, વાવડી ગામની સરકારી ખરાબાની જમીનમાં મંદિર આવેલું છે. આ મંદિર પરથી વીજલાઇન પસાર કરવાની કામગીરી સામે સ્થાનિક સ્તરે વિરોધ ચાલી રહ્યો છે. વીજ કંપનીઓ દ્વારા વીજપોલ ઊભા કરવાના નિર્ણયના વિરોધમાં ખેડૂતો અને ગ્રામજનો દ્વારા આંદોલન શરૂ કરવામાં આવ્યું છે. આ મુદ્દે પોતાના ધાર્મિક સ્થળ તેમજ ખેડૂતોના હકની રક્ષા કરવાની માંગ સાથે નીરા મહારાજે અન્નનો ત્યાગ કરીને સત્યાગ્રહ શરૂ કર્યો હતો. સત્યાગ્રહના બીજા દિવસે સતત ઉપવાસને કારણે તેમની તબિયત અચાનક લથડી હતી.
નીરા મહારાજની તબિયત બગડતાં સત્યાગ્રહ સ્થળે હાજર ખેડૂતો અને ગ્રામજનોમાં ચિંતા ફેલાઈ હતી. પરિસ્થિતિને ધ્યાનમાં લઈને તાત્કાલિક ૧૦૮ ઇમર્જન્સી સેવા માટે જાણ કરવામાં આવી હતી. થોડીવારમાં એમ્બ્યુલન્સ સ્થળ પર પહોંચી હતી. તબીબી ટીમે નીરા મહારાજને પ્રાથમિક સારવાર આપ્યા બાદ વધુ સારવાર માટે જાડિયાની સરકારી હોસ્પિટલમાં ખસેડ્યા હતા.
હાલ નીરા મહારાજને જાડિયાની સરકારી હોસ્પિટલમાં સારવાર આપવામાં આવી રહી છે. તબીબોની ટીમ તેમની તબિયત પર નજર રાખી રહી છે. દરમિયાન, વીજલાઇન અને વીજપોલના મુદ્દે ખેડૂતોનો વિરોધ યથાવત્ છે. મંદિર પરથી વીજલાઇન પસાર કરવાના નિર્ણય અંગે ગ્રામજનો અને વીજ કંપની વચ્ચે શું ઉકેલ આવે છે તેના પર હવે સૌની નજર છે.