દેશનો જીએસટી (ગુડ્સ અને સર્વિસ ટેક્સ) વસૂલાત મે ૨૦૨૬ માં ૩.૨ ટકા વધીને ૧.૯૪ લાખ કરોડથી વધુ થઈ ગયો.જીએસટી વસૂલાતમાં આ વધારો માલ અને સેવાઓના પુરવઠામાં સુધારો અને આયાતમાંથી કર વસૂલાતમાં સતત વધારાને કારણે થયો હતો. સોમવારે જાહેર કરાયેલા સરકારી ડેટામાં આ માહિતી બહાર આવી છે. મે ૨૦૨૫માં કુલ જીએસટી કલેક્શન ૧.૮૮ લાખ કરોડ હતું. મે દરમિયાન સ્થાનિક વ્યવહારોમાંથી સેન્ટ્રલ જીએસટી કલેક્શન ૩૭,૩૯૭ કરોડ, સ્ટેટ જીએસટી કલેક્શન ૪૫,૧૪૩ કરોડ અને ઇન્ટીગ્રેટેડ જીએસટી કલેક્શન ૫૧,૯૯૦ કરોડ હતું. આ સમયગાળા દરમિયાન, કરપાત્ર માલસામાનના પુરવઠામાં ૨૬.૯ ટકાનો વધારો થયો છે, જે સ્થાનિક માંગને પ્રતિબિંબિત કરે છે. સેવા ક્ષેત્રમાં ૨૨.૨ ટકાનો વધારો જોવા મળ્યો છે, જે મજબૂત સ્થાનિક વપરાશને પ્રતિબિંબિત કરે છે.
મે મહિનામાં આયાતમાંથી આઇજીએસટી કલેક્શન ૧૯.૧ ટકા વધીને ૫૯,૬૫૪ કરોડ થયું છે, જે ઔદ્યોગિક ક્ષમતાના વિસ્તરણનો સંકેત આપે છે. જીએસટી રિફંડ ૨.૬ ટકા વધીને ૨૭,૨૮૧ કરોડ થયું છે. રિફંડ માટે સમાયોજિત કર્યા પછી, મે મહિનામાં ચોખ્ખી જીએસટી આવક ૩.૩ ટકા વધીને આશરે ૧.૬૭ લાખ કરોડ થઈ છે. અગાઉ, એપ્રિલમાં જીએસટી કલેક્શન ૨.૪૩ લાખ કરોડના જીવનકાળના ઉચ્ચતમ સ્તર પર પહોંચ્યું હતું. નાણાકીય વર્ષ ૨૦૨૬-૨૭ ના પ્રથમ બે મહિના (એપ્રિલ અને મે) માં એકંદર જીએસટી કલેક્શન વાર્ષિક ધોરણે ૬.૨ ટકા વધીને ૪.૩૭ લાખ કરોડ થયું. આ નાણાકીય વર્ષ ૨૦૨૫-૨૬ ના સમાન સમયગાળામાં ૪.૧૧ લાખ કરોડની સરખામણીમાં હતું.
સરકારે ચાલુ નાણાકીય વર્ષમાં૧૦.૧૯ લાખ કરોડનો લક્ષ્યાંક નક્કી કર્યો છે. પ્રોફેશનલ સર્વિસીસ ફર્મ ડેલોઇટ ઇન્ડિયાના ભાગીદાર અને પરોક્ષ કરના વડા મહેશ જે. એ જણાવ્યું હતું કે મે મહિનામાં સ્થાનિક કામગીરી પ્રમાણમાં ઓછી રહી હતી, જેને એપ્રિલમાં મજબૂત આધારના સંદર્ભમાં જોવી જોઈએ. જોકે, જીએસટી ૨.૦ હેઠળ કર દર સુધારા આવક પર નોંધપાત્ર અસર કર્યા વિના વપરાશ અને માંગને ટેકો આપી રહ્યા છે. તેમણે કહ્યું કે ઉદ્યોગ આગામી જીએસટી કાઉન્સીલની બેઠકમાં વ્યવસાય કરવાની સરળતામાં સુધારો કરવા અને કાર્યકારી મૂડીને વધુ મુક્ત કરવાના પગલાંની અપેક્ષા રાખે છે.