સમાજના વિકાસથી લઈને અગ્રસેન જન્મજયંતિની ભવ્ય ઉજવણી સુધીના વિવિધ મુદ્દાઓ પર કરાઈ વિસ્તૃત ચર્ચા.
ઝાલોદ અગ્રવાલ સમાજ દ્વારા શ્રાવણ માસ નિમિત્તે સ્નેહ મિલન (ગોઠ) તેમજ સમાજની જનરલ મીટિંગનું આયોજન કરવામાં આવ્યું હતું. ઝાલોદથી આશરે ૫૫ કિલોમીટર દૂર, લીમખેડા અને દાહોદ વચ્ચે આવેલા કાચાલા ખાતે બાપુ નરસિંહ સેવાનંદ ધામમાં આ કાર્યક્રમ યોજાયો હતો.
કુદરતી સૌંદર્યના ખોળામાં વસેલા અને શાંતિપૂર્ણ વાતાવરણ ધરાવતા આ રમણીય સ્થળે અગ્રવાલ સમાજના પરિવારો એકત્ર થયા હતા. સ્નેહ મિલનના માધ્યમથી સમાજના પરિવારો વચ્ચે પરસ્પર સ્નેહ, આત્મીયતા અને એકતાનો માહોલ જોવા મળ્યો હતો.
આ પ્રસંગે યોજાયેલી જનરલ મીટિંગમાં સમાજના વિકાસ અને પ્રગતિને લઈને મહત્વપૂર્ણ ચર્ચા-વિચારણા કરવામાં આવી હતી. સમાજના હિતમાં આગામી સમયમાં હાથ ધરવાના વિવિધ કાર્યો, સામાજીક પ્રવૃત્તિઓ તેમજ સમાજને વધુ સંગઠિત અને સશક્ત બનાવવા અંગે સભ્યો દ્વારા સૂચનો રજૂ કરવામાં આવ્યા હતા.
આગામી અગ્રસેન જન્મજયંતિ તા. ૧૧-૧૦-૨૦૨૬, રવિવારના રોજ ઉજવાવાની હોવાથી તેની ઉજવણીને ભવ્ય અને યાદગાર બનાવવા માટે આયોજન અંગે પણ વિસ્તૃત ચર્ચા કરવામાં આવી હતી. કાર્યક્રમના આયોજન, વિવિધ જવાબદારીઓ તેમજ સમાજના પરિવારોની વધુમાં વધુ ભાગીદારી સુનિશ્ચિત કરવા અંગે સભ્યો સાથે વિચારવિમર્શ કરવામાં આવ્યો હતો.
મીટિંગ દરમિયાન સમાજની એકતા, વિકાસ અને સામાજીક જવાબદારીને પ્રાથમિકતા આપી સૌના સહયોગથી આગળ વધવાનો સંકલ્પ વ્યક્ત કરવામાં આવ્યો હતો.
કુદરતની સુંદરતા વચ્ચે યોજાયેલ આ સ્નેહ મિલન માત્ર એક કાર્યક્રમ નહીં પરંતુ સમાજના પરિવારોને એકબીજા સાથે જોડતું, સ્નેહ અને એકતાને મજબૂત બનાવતું અને નવી દિશા તરફ આગળ વધવાનો સંદેશ આપતું મિલન બની રહ્યું હતું.