કેન્દ્રીય ગૃહમંત્રી અને ગાંધીનગરના સાંસદ અમિત શાહ આગામી ૧૩ જાન્યુઆરી, ૨૦૨૬ના રોજ પોતાના સંસદીય મતવિસ્તાર ગાંધીનગરમાં કરોડો રૂપિયાના વિકાસ કાર્યોની ભેટ આપવા જઈ રહ્યા છે. આ પ્રવાસ દરમિયાન તેઓ ગુજરાતને પશુ આરોગ્ય અને રમતગમત ક્ષેત્રે નવી ઊંચાઈઓ અપાવનારી બે મહત્વની સુવિધાઓનું લોકાર્પણ કરશે.
ગાંધીનગરના સેક્ટર-૨૮ ખાતે એનિમલ વેક્સિન ઇન્સ્ટિટ્યૂટ પાસે તૈયાર થયેલી બાયો-સેટી લેવલ-૪ લેબનું લોકાર્પણ અમિત શાહ કરશે. આ લેબ ગુજરાતની સર્વપ્રથમ અને દેશમાં બીજી આવી અત્યાધુનિક સુવિધા છે.આ અત્યંત ઉચ્ચ સુરક્ષા સ્તરની લેબમાં અત્યંત ચેપી વાયરસ અને પશુઓમાં ફેલાતા ગંભીર રોગો પર સંશોધન કરી શકાશે. લેબમાં અદ્યતન બાયો-કન્ટેઇનમેન્ટ ફેસીલીટી સ્થાપિત કરવામાં આવી છે, જે ચેપી રોગોના અભ્યાસ દરમિયાન સંપૂર્ણ સુરક્ષા પૂરી પાડશે.આ સુવિધા ગુજરાતને પશુ આરોગ્ય, રસી વિકાસ અને પશુધન સંરક્ષણના ક્ષેત્રમાં વૈશ્ર્વિક સ્તરે અગ્રેસર બનાવશે. ખાસ કરીને ડેરી ઉદ્યોગ અને પશુપાલનને આધાર આપતા ગુજરાત માટે આ એક માઈલસ્ટોન સાબિત થશે.
આ જ દિવસે સવારે ૧૦ કલાકે માણસા તાલુકાની આર્ટસ કોલેજ સંકુલ ખાતે અમિત શાહ નવનિમત અદ્યતન રમતગમત સંકુલનું જનતાને સમર્પણ કરશે.આ આધુનિક સ્પોર્ટ્સ કોમ્પ્લેક્સમાં ગ્રામીણ અને શહેરી ખેલાડીઓને વિશ્ર્વસ્તરની સુવિધાઓ ઉપલબ્ધ થશે, જેમાં આંતરરાષ્ટ્રીય સ્તરના રમતના મેદાનો, જિમ અને ફિટનેસ સેન્ટર, ટ્રેનિંગ રૂમ્સ, બદલાતા રૂમ અને અન્ય આધુનિક સુવિધાઓ ઉપલબ્ધ હશે. આ સંકુલ ગ્રામીણ વિસ્તારોમાંથી ઉભરતી પ્રતિભાઓને પ્રોત્સાહન આપશે અને રાજ્યના રમતગમત ક્ષેત્રને નવી દિશા આપશે.આ ઉપરાંત માણસા તાલુકા અને ગાંધીનગરમાં વિવિધ વિકાસ પ્રકલ્પો જેમ કે રસ્તા, પાણી પુરવઠો, શિક્ષણ અને આરોગ્ય સંબંધિત કામોનું પણ લોકાર્પણ થશે.