વડા પ્રધાન નરેન્દ્ર મોદી હાલમાં ત્રણ દેશોના પ્રવાસ પર છે, તેઓ ઓસ્ટ્રેલિયા પહોંચી ગયા છે. અહીં, પીએમ મોદીએ ૧૦ જુલાઈના રોજ ઐતિહાસિક મેલબોર્ન ક્રિકેટ ગ્રાઉન્ડ ખાતે ઓસ્ટ્રેલિયાના વડા પ્રધાન એન્થોની અલ્બેનીસની હાજરીમાં એક મોટી જાહેરાત કરી. પીએમ મોદીએ સત્તાવાર રીતે જાહેરાત કરી હતી કે ઓસ્ટ્રેલિયા સ્થિતિ ફ્રેન્ચાઇઝ આધારિત ટી ૨૦ લીગ બિગ બેશ લીગની ૧૬મી સીઝનની શરૂઆતની મેચ ભારતમાં રમાશે. આ પહેલી વાર બનશે જ્યારે કોઈ વિદેશી ટી ૨૦ લીગની શરૂઆતની મેચ ભારતમાં રમાશે. આ મેચ ૧૨ ડિસેમ્બરે ચેન્નાઈના એમએ ચિદમ્બરમ સ્ટેડિયમમાં મેલબોર્ન રેનેગેડ્સ અને પર્થ સ્કોર્ચર્સ વચ્ચે રમાશે.
બિગ બેશ લીગ ભારતમાં ચાહકોનું ખૂબ જ પ્રિય છે, આ સીઝન સામાન્ય રીતે ડિસેમ્બરમાં શરૂ થાય છે, જેની ફાઇનલ મેચ જાન્યુઆરીમાં રમાય છે. પ્રથમ વખત,બીબીએલ સીઝન કોઈ વિદેશી દેશમાં યોજાશે. ડિસેમ્બરમાં ભારતમાં યોજાનારા અઠવાડિયા લાંબા ઓસ્ટ્રેલિયન કલ્ચરલ ફેસ્ટિવલમાં બીબીએલ ૨૦૨૬-૨૭ ની શરૂઆતની મેચ પણ એક મુખ્ય આકર્ષણ રહેશે.૧૦ જુલાઈની સવારે મેલબોર્ન ક્રિકેટ ગ્રાઉન્ડ પર પીએમ મોદીએ ભારત અને ઓસ્ટ્રેલિયા વચ્ચેના રમતગમતના સંબંધો વિશે વાત કરતા કહ્યું, “જ્યારે પણ મને મારા મિત્ર પ્રધાનમંત્રી અલ્બેનીસને મળવાની તક મળી છે, ત્યારે ક્રિકેટ અમારી વચ્ચે એક કુદરતી બંધન રહ્યું છે. અમે અમદાવાદમાં સાથે સ્ટેડિયમની મુલાકાત લીધી હતી, અને આજે અહીં, હું ખરેખર રમતની ભાવના અનુભવી શકું છું, ખાસ કરીને સ્ટીવ વો અને લિસા સ્થાલેકર જેવા દિગ્ગજા અમારી વચ્ચે હાજર છે.” મેલબોર્ન ક્રિકેટ ગ્રાઉન્ડ પર પગ મૂકતા કોઈપણ ભારતીયમાં બે લાગણીઓ જગાડે છેઃ ભારત-ઓસ્ટ્રેલિયા મેચનો ઉત્સાહ, અને એ અનુભૂતિ કે ક્રિકેટ આપણા બંને દેશોમાં માત્ર એક રમત નથી, પરંતુ એક સહિયારો જુસ્સો છે. છતાં, આજે, છેલ્લી ઓવરના રોમાંચનું કોઈ દબાણ નથી. ફક્ત રમતનો આનંદ, આપણી મિત્રતાની આત્મીયતા અને ભવિષ્યના ચેમ્પિયનની ઉર્જા છે.