અમદાવાદના સેટેલાઇટ વિસ્તારમાં રહેતા અને એલિસબ્રિજની ખાનગી ફાઇનાન્સ કંપનીમાં છેલ્લા છ મહિનાથી એકાઉન્ટન્ટ તરીકે ફરજ બજાવતા ૫૧ વર્ષીય કર્મચારી સાયબર ઠગાઈનો ભોગ બન્યા છે. ગત ૬ જુલાઈએ તેમના ઉરટ્ઠંજછpp પર અજાણ્યા નંબર પરથી મેસેજ આવ્યો હતો. ઠગોએ કંપનીના માલિકના નામે આ નંબર રાખ્યો હતો અને પ્રોફાઇલ પિક્ચરમાં પણ માલિકનો ફોટો રાખ્યો હતો.
મેસેજમાં એક બેંક ખાતાની વિગતો મોકલી તેમાં ૯૫.૮૦ લાખ રૂપિયા જમા કરાવવાનો આદેશ આપવામાં આવ્યો હતો. મેસેજ માલિક તરફથી જ આવ્યો હોવાનું માનીને એકાઉન્ટન્ટે કોઈ શંકા કરી નહોતી. કંપનીના નાણાકીય વ્યવહારો સંભાળતા હોવાથી તેમણે સૂચન મુજબ તરત જ ઓનલાઈન માધ્યમથી ૯૫.૮૦ લાખ રૂપિયા સંબંધિત ખાતામાં ટ્રાન્સફર કરી દીધા હતા.
ઠગોએ એકાઉન્ટન્ટને બીજા દિવસે ફરી એ જ નંબર પરથી મેસેજ કર્યો હતો. આ વખતે અન્ય એક બેંક ખાતામાં ૧.૨૬ કરોડ રૂપિયા ટ્રાન્સફર કરવા માટે કહેવામાં આવ્યું હતું. અગાઉની રકમ કરતાં પણ મોટી રકમ હોવાથી એકાઉન્ટન્ટને શંકા ગઈ હતી. તેથી તેમણે સીધા ઓફિસમાં જઈને માલિક સાથે આ વ્યવહાર અંગે વાત કરી હતી.
ઓફિસમાં માલિક સાથે વાત કરતાં સમગ્ર ઘટનાનો ભાંડો ફૂટ્યો હતો. માલિકે સ્પષ્ટતા કરી હતી કે તેમણે એકાઉન્ટન્ટને અગાઉ કે તે દિવસે આવો કોઈ મેસેજ કર્યો જ નહોતો. આ સાંભળીને એકાઉન્ટન્ટને પોતાની સાથે સાયબર ઠગાઈ થઈ હોવાનું સમજાયું હતું. ઠગોએ માલિકના નામ અને ફોટાનો ઉપયોગ કરીને તેમને વિશ્વાસમાં લીધા હતા.
ઠગાઈની જાણ થતાં એકાઉન્ટન્ટે તાત્કાલિક સાયબર ક્રાઈમ પોલીસ મથકે ફરિયાદ નોંધાવી હતી. તેમાં ૯૫.૮૦ લાખ રૂપિયાની રકમ ઓનલાઈન ટ્રાન્સફર થઈ હોવાની વિગતો આપવામાં આવી છે. પોલીસે ફરિયાદના આધારે ગુનો નોંધી તપાસ શરૂ કરી છે. પોલીસ હવે મેસેજ મોકલનાર નંબર, બેંક ખાતું અને નાણાકીય વ્યવહારોની વિગતોના આધારે આરોપીઓ સુધી પહોંચવાનો પ્રયાસ કરી રહી છે.
આ ઘટનાએ ફરી એકવાર દર્શાવ્યું છે કે માત્ર નંબર, નામ અને પ્રોફાઇલ ફોટો જાઈને વોટ્સએપ પર મળેલા નાણાકીય સૂચન પર વિશ્વાસ કરવો જોખમી બની શકે છે. ખાસ કરીને મોટી રકમના વ્યવહાર પહેલાં સંબંધિત વ્યક્તિ સાથે સીધી વાત કરીને સૂચન ખરેખર તેમના તરફથી છે કે નહીં તેની ખાતરી કરવી જરૂરી છે.