તહેવારો ટાણે અમદાવાદ ગ્રામ્ય વિસ્તારમાં નશાનો કાળો કારોબાર ફાલીફૂલ્યો છે, ત્યારે નળ સરોવર પોલીસે નશાકારક કફ સીરપના નેટવર્કનો પર્દાફાશ કરીને સપાટો બોલાવ્યો છે. તાજેતરમાં ગાંધીનગર સ્ટેટ મોનિટરિંગ સેલ દ્વારા સાણંદમાંથી દારૂનો જથ્થો ઝડપી પાડવામાં આવ્યા બાદ, હવે સ્થાનિક એલસીબી અને એસઓજી ટીમની નિષ્ક્રિયતા વચ્ચે નળ સરોવર પોલીસ મથકના પીઆઇ એમ.કે. પિયેજા અને તેની ટીમે ૨૪ કલાકના ટૂંકા ગાળામાં બે અલગ-અલગ સફળ દરોડા પાડીને મોટી કાર્યવાહી આચરી છે.
નળ સરોવર પોલીસે બાતમીના આધારે સાણંદ તાલુકાના ઉપરદળ ગામે દરોડો પાડ્યો હતો. જ્યાંથી શંકાસ્પદ સ્વીફ્ટ કારમાંથી ૮૦ બોટલ નશાકારક કફ સીરપ મળી આવી હતી. પોલીસે કારમાં સવાર હરશન કોળીપટેલ અને કમલેશ સોલંકીને અટકાયતમાં લઈ કફ સીરપ, કાર તથા અન્ય સામગ્રી મળી કુલ ૫.૩૨ લાખ રૂપિયાથી વધુનો મુદ્દામાલ જપ્ત કર્યો હતો. ઝડપાયેલા બંને આરોપીઓની કડક પૂછપરછ હાથ ધરતાં આ રેકેટના મુખ્ય સપ્લાયર સદ્દામ ખલીફાનું નામ સામે આવ્યું હતું. પોલીસે તાત્કાલિક કાર્યવાહી કરી સદ્દામ ખલીફાની અટકાયત કરી હતી. તેની સઘન પૂછપરછ બાદ આરોપી સદ્દામે બાવળાના દેવડથલ ગામ નજીક આવેલા ડાંગરના ખેતરમાં સંતાડેલી વધુ ૩૭૦ બોટલ કફ સીરપનો જથ્થો મળ્યો હોતો.
પોલીસે બંને દરોડા દરમિયાન મળીને ૯૮,૫૫૦ રૂપિયાની કિંમતની કુલ ૪૫૦ બોટલ કોડેઈનયુક્ત કફ સીરપ સીઝ કરી છે. આ નશાકારક કફ સીરપના કાળા કારોબારના તાર ક્યા સુધી જાડાયેલા છે તે દિશામાં તપાસ લંબાવતાં બાવળાના ‘અનીયા’ નામના શખસનું નામ સામે આવ્યું છે. પોલીસે તમામ આરોપીઓ સામે ગુનો નોંધી ફરાર અનીયાને ઝડપી પાડવા ચક્રો ગતિમાન કર્યા છે.