રશિયાના રાષ્ટ્રપતિ વ્લાદિમીર પુતિને પ્રધાનમંત્રી નરેન્દ્ર મોદીને તેમના ૭૬મા જન્મદિવસ પર અભિનંદન આપ્યા. પીએમ મોદીની પ્રશંસા કરતા, રશિયન રાષ્ટ્રપતિએ કહ્યું કે ભારત અને રશિયા વચ્ચે “વિશેષ અને વિશેષાધિકૃત વ્યૂહાત્મક ભાગીદારી” ને મજબૂત બનાવવામાં તેમના વ્યક્તિગત યોગદાનને ઓછું આંકી શકાય નહીં. રશિયન દૂતાવાસે ગુરુવારે ઠ પર પુતિનનો સંદેશ શેર કર્યો. પ્રધાનમંત્રી નરેન્દ્ર મોદીનો જન્મદિવસ આજે ૧૭ સપ્ટેમ્બરના રોજ ખૂબ જ ધામધૂમથી ઉજવવામાં આવી રહ્યો છે.
પોતાના સંદેશમાં, પુતિને કહ્યું કે તમે તમારા દેશવાસીઓનો ઊંડો આદર અને વૈશ્વિક મંચ પર ખૂબ જ આદરનો આનંદ માણો છો. તેમણે કહ્યું કે ભારત અને રશિયા વચ્ચેની વિશેષ અને વિશેષાધિકૃત વ્યૂહાત્મક ભાગીદારીને મજબૂત બનાવવામાં તમારા વ્યક્તિગત યોગદાનને ઓછું આંકી શકાય નહીં. ગયા અઠવાડિયે નવી દિલ્હીની મુલાકાત દરમિયાન મળેલા ઉષ્માભર્યા સ્વાગત અને આતિથ્ય માટે રશિયન રાષ્ટ્રપતિએ પ્રધાનમંત્રી મોદીનો પણ આભાર માન્યો. તેમણે કહ્યું,
“ગયા અઠવાડિયે નવી દિલ્હીની મારી મુલાકાત દરમિયાન મને અને રશિયન પ્રતિનિધિમંડળને આપવામાં આવેલા ઉષ્માભર્યા અને સૌહાર્દપૂર્ણ સ્વાગત અને આતિથ્ય માટે હું કૃતજ્ઞતા વ્યક્ત કરવા માંગુ છું.”
પુતિને તેમની ભારત મુલાકાત દરમિયાન પ્રધાનમંત્રી મોદી સાથેની તેમની વાતચીતનો પણ ઉલ્લેખ કર્યો. તેમણે કહ્યું કે બંને નેતાઓ વચ્ચેની વાતચીત અર્થપૂર્ણ, સ્પષ્ટ અને રચનાત્મક હતી. તેમણે કહ્યું,”અમારી વાતચીત ચોક્કસપણે અર્થપૂર્ણ, સ્પષ્ટ અને ઉત્પાદક રહી. હંમેશની જેમ, તમારી સાથે વાત કરીને મને આનંદ થયો. અમારી ચર્ચાએ ફરી એકવાર તમારી અસાધારણ રાજકીય કુનેહ અને દૂરંદેશી દર્શાવી.”રશિયન રાષ્ટÙપતિએ કહ્યું કે ભારત અને રશિયા દ્વિપક્ષીય અને આંતરરાષ્ટ્રીય મુદ્દાઓ પર સાથે મળીને કામ કરવાનું ચાલુ રાખશે.
પુતિનનો સંદેશ એવા સમયે આવ્યો જ્યારે તેઓ ગયા અઠવાડિયે ૧૮મા બ્રિક્સ સમિટમાં હાજરી આપવા માટે ભારતની મુલાકાતે આવ્યા હતા. તેમણે ૧૨ અને ૧૩ સપ્ટેમ્બરના રોજ દિલ્હીમાં યોજાયેલા સમિટ દરમિયાન બે બ્રિક્સ સત્રોમાં ભાગ લીધો હતો. પુતિને ભારત મંડપમ ખાતે આયોજિત “ઈન્ડિયા ઇનોવેટ્સ” પ્રદર્શનની પણ મુલાકાત લીધી હતી. તેમણે નવી દિલ્હીમાં આયોજિત બ્રિક્સ બિઝનેસ ફોરમના નેતાઓના સત્રને પણ સંબોધિત કર્યું. સત્ર દરમિયાન પુતિને પશ્ચિમી દેશો પર નિશાન સાધતા કહ્યું કે યુક્રેનમાં સૈનિકો મોકલવા એ રશિયા સાથે યુદ્ધ સમાન હશે.