પીએમ મોદી જોર્ડન પહોંચ્યા.તેમની મુલાકાતનો બીજો દિવસ છે. તેઓ ભારત-જોર્ડન બિઝનેસ ફોરમ બેઠકને સંબોધિત કરશે. સોમવારે અગાઉ, જોર્ડનના રાજા અબ્દુલ્લાએ હુસૈનિયા પેલેસ ખાતે પીએમ મોદીનું આલિંગન કરીને સ્વાગત કર્યું. બંનેએ દ્વિપક્ષીય બેઠક પણ યોજી. મીટિંગ દરમિયાન, મોદીએ કહ્યું કે ભારત અને જોર્ડન આતંકવાદ સામે સમાન દ્રષ્ટિકોણ ધરાવે છે. તેમણે ઉષ્માભર્યા સ્વાગત માટે રાજા અબ્દુલ્લાનો આભાર માન્યો. તેમણે ખાતરો અને ડિજિટલ ટેકનોલોજીમાં સહયોગ વધારવા વિશે પણ વાત કરી. બંને દેશો વચ્ચે પાંચ મહત્વપૂર્ણ કરારો પર હસ્તાક્ષર થયા.
ભારત અને જોર્ડન વચ્ચે પાંચ મહત્વપૂર્ણ કરારો પર હસ્તાક્ષર કરવામાં આવ્યા છે. આમાં સંસ્કૃતિ, નવીનીકરણીય ઉર્જા, પાણી વ્યવસ્થાપન, ડિજિટલ જાહેર માળખાગત સુવિધાઓ અને ઐતિહાસિક વારસાના સંરક્ષણ સંબંધિત કરારોનો સમાવેશ થાય છે. બંને દેશોએ સંસ્કૃતિના ક્ષેત્રમાં સહયોગ વધારવા, નવીનીકરણીય અને સ્વચ્છ ઉર્જા પ્રોજેક્ટ્સ પર સાથે મળીને કામ કરવા અને જળ સંસાધનોનું વધુ સારી રીતે સંચાલન કરવા માટે કરારો પર હસ્તાક્ષર કર્યા. ડિજિટલ જાહેર માળખાગત સુવિધાઓ હેઠળ, ડિજિટલ શાસન અને ટેકનોલોજી આધારિત જાહેર સેવાઓમાં ભાગીદારીને આગળ વધારવા માટે એક કરાર થયો.
આ ઉપરાંત, જોર્ડનના વિશ્ર્વ-પ્રસિદ્ધ ઐતિહાસિક સ્મારક, પેટ્રા અને ભારતની એલોરા ગુફાઓ વચ્ચે એક જોડિયા કરાર પર હસ્તાક્ષર કરવામાં આવ્યા. આ વારસા સંરક્ષણ, પર્યટન અને પરસ્પર સાંસ્કૃતિક સહયોગને પ્રોત્સાહન આપશે. હોટલમાં પહોંચ્યા પછી, પીએમ ભારતીય સમુદાયના સભ્યોને મળ્યા. આ દરમિયાન, તેઓ એક નાની છોકરી સાથે હાથ મિલાવતા જોવા મળ્યા. ભારત અને જોર્ડને ૧૯૫૦ માં રાજદ્વારી સંબંધો સ્થાપિત કર્યા, જે ૨૦૨૫ માં ૭૫ વર્ષ પૂર્ણ કરશે. આ પ્રસંગે મોદીએ જોર્ડનની મુલાકાત લીધી.
ભારત જોર્ડનનો ચોથો સૌથી મોટો વેપાર ભાગીદાર છે. ૨૦૨૩-૨૪ માં બંને દેશો વચ્ચે વેપાર ૨૬,૦૩૩ કરોડનો હતો, જેમાં ભારતની નિકાસ આશરે ૧૩,૨૬૬ કરોડ હતી. બંને દેશોએ દ્વિપક્ષીય વેપાર ૫ બિલિયન (૪૫૨.૭૫ કરોડ રૂપિયા) સુધી વધારવાનો લક્ષ્યાંક રાખ્યો છે. ભારત જોર્ડન પાસેથી મોટા પ્રમાણમાં રોક ફોસ્ફેટ અને ખાતર કાચા માલ ખરીદે છે. જોર્ડન ભારતના કુલ રોક ફોસ્ફેટ આયાતમાં આશરે ૪૦% હિસ્સો ધરાવે છે.
બીજી બાજુ, જોર્ડન ભારતમાંથી મશીનરી, પેટ્રોલિયમ, અનાજ, રસાયણો, માંસ, ઓટો પાર્ટ્સ અને ઔદ્યોગિક ઉત્પાદનોની આયાત કરે છે. ભારતીય કંપનીઓએ જોર્ડનના ફોસ્ફેટ અને કાપડ ક્ષેત્રોમાં ઇં૧.૫ બિલિયનથી વધુનું રોકાણ કર્યું છે. જોર્ડનના રાજા અબ્દુલ્લા બીજાને પયગંબર મુહમ્મદના સૌથી નજીકના વંશજ માનવામાં આવે છે. તેઓ સીધા હાશિમી કુળ સાથે સંબંધિત છે. મુહમ્મદ કુરૈશ જાતિના હતા. કુરૈશ જાતિની એક શાખા બાનુ હાશિમ હતી. આ બાનુ હાશિમમાંથી હાશિમી રાજવંશની ઉત્પત્તિ થઈ, જે ઇસ્લામમાં સૌથી પ્રતિષ્ઠિત રાજવંશ માનવામાં આવે છે.
પયગંબર મુહમ્મદની પુત્રી, હઝરત ફાતિમા, તેમના જમાઈ, હઝરત અલી અને તેમના પુત્રો, હસન અને હુસૈન, પાછળથી ઘણી પેઢીઓ પછી મક્કાના શરીફ બન્યા. મક્કાના શરીફ પાછળથી હાશિમી રાજવંશના શાસક બન્યા. જોર્ડનના શાસકો હાશિમી રાજવંશમાંથી આવે છે. આ રાજવંશે લગભગ ૭૦૦ વર્ષ સુધી મક્કા પર શાસન કર્યું. જોર્ડનના પહેલા રાજા શરીફ હુસૈન બિન અલી હતા. વર્તમાન રાજા, અબ્દુલ્લા-૨, તેમના પ્રપૌત્ર છે. આમ, તેમનો વંશ સીધો પ્રોફેટ મુહમ્મદ સાથે જોડાયેલો છે. જોર્ડન એક બંધારણીય રાજાશાહી છે, જ્યાં રાજા બનવાની પ્રક્રિયા બંધારણમાં સ્થાપિત થયેલ છે. જોર્ડનના બંધારણમાં એવી જોગવાઈ છે કે સત્તાનો ઉત્તરાધિકાર હાશિમી રાજવંશમાંથી હોવો જોઈએ, અને સિંહાસન પિતાથી પુત્રમાં જશે.
જોર્ડન મય પૂર્વમાં એકમાત્ર એવો દેશ છે જે નો-ઓઇલ દેશ તરીકે ઓળખાય છે. ઇઝરાયલ, લેબનોન, યમન અને બહેરીન જેવા દેશોમાં તેલનું ઉત્પાદન લગભગ નહિવત્ છે, તેમ છતાં આ દેશોમાં ભવિષ્યમાં તેલનું ઉત્પાદન થવાની સંભાવના છે. તેથી, આ દેશોને તેલ-મુક્ત દેશો ગણવામાં આવતા નથી.
હકીક્તમાં, મય પૂર્વીય દેશો કે જેમની પાસે વિશાળ તેલ ભંડાર છે તેઓ લાખો વર્ષો પહેલા મહાસાગરોનું ઘર હતા. દરિયાઈ જીવોના મૃત્યુ પછી, તેઓ કાદવ, રેતી અને માટી સાથે કાંપવાળા ખડકોમાં દટાઈ ગયા અને તેલમાં ફેરવાઈ ગયા.જોર્ડનનો મોટાભાગનો ભાગ રણ અને પર્વતીય ખડકોથી બનેલો છે, જે સમુદ્રના સંપર્કમાં નહોતા આવ્યા, તેથી અહીં તેલ બનાવવાની પ્રક્રિયા થઈ શકી નથી. તેલનો અભાવ હોવા છતાં, જોર્ડનમાં ફોસ્ફેટ અને પોટાશ નોંધપાત્ર પ્રમાણમાં છે. બંનેનો ઉપયોગ ખાતરોમાં થાય છે અને જોર્ડનના અર્થતંત્ર માટે મહત્વપૂર્ણ છે.