ઉત્તર પ્રદેશ વિધાનસભાના ચોમાસુ સત્રના ત્રીજા દિવસે, વિધાનસભા અધ્યક્ષ સતીશ મહાના ગૃહની કાર્યવાહી દરમિયાન ભાવુક થઈ ગયા. તેમણે મંગળવારે ગૃહમાં થયેલા હોબાળા પર પોતાની નારાજગી અને વ્યથા વ્યક્ત કરી. તેમણે કહ્યું, “આ મારા રાજકીય કારકિર્દીનો છેલ્લો તબક્કો છે. હવે મારે ગંભીરતાથી વિચાર કરવો પડશે કે શું હું વિધાનસભાના અધ્યક્ષ પદ માટે લાયક છું.
મને મારા હૃદયમાં દુઃખ થાય છે. પહેલી વાર, મને લાગે છે કે કાં તો આપણા પ્રયત્નો ઓછા પડ્યા અથવા ડા. ભીમરાવ આંબેડકર સાચા હતા જ્યારે તેમણે કહ્યું હતું કે ખામી બંધારણમાં નથી પરંતુ તેને ચલાવનારા લોકોમાં છે.”તેમણે કહ્યું કે છેલ્લા સાડા ચાર વર્ષથી, તેમણે ગૃહને ગૌરવ અને સંવાદથી ચલાવવાનો પ્રયાસ કર્યો હતો, પરંતુ તાજેતરની ઘટનાઓ પછી, તેમને આત્મનિરીક્ષણ કરવાની જરૂર લાગી. “હું ગંભીરતાથી વિચારીશ કે મેં જે કર્યું તે યોગ્ય હતું કે નહીં. હું આ સંદર્ભમાં ટૂંક સમયમાં નિર્ણય લઈશ.
”યુપી વિધાનસભામાં સતત હોબાળો ચાલુ રહ્યો. આ દરમિયાન, ઘણા મહત્વપૂર્ણ બિલો ચર્ચા વિના પસાર થઈ ગયા. આ પછી, સંસદીય બાબતોના મંત્રી સુરેશ ખન્નાએ ગૃહને અનિશ્ચિત સમય માટે સ્થગિત કરવાની વિનંતી કરી, જેના પર સ્પીકરે સંમતિ આપી.”નાયબ મુખ્યમંત્રી કેશવ પ્રસાદ મૌર્યએ કહ્યું કે સમાજવાદી પાર્ટી એક એવી રાજકીય પાર્ટી છે જેણે ક્્યારેય લોકશાહી પરંપરાઓ કે પ્રણાલીઓનું સન્માન કર્યું નથી. ગઈકાલે વિધાનસભામાં પાર્ટીના વર્તન માટે ગમે તેટલી નિંદા કરવામાં આવે તે પૂરતું નથી. સપા સભ્યોએ મુખ્યમંત્રી યોગી આદિત્યનાથને બોલવાની તક પણ આપી ન હતી.
આ બતાવે છે કે તેમનો એકમાત્ર હેતુ ગૃહનો સમય બગાડવાનો છે. તેમને રાજ્યના લોકો માટે કોઈ ચિંતા નથી. જે લોકો બાબર કે બાબરી મસ્જિદને ટેકો આપે છે તેમને શ્રી રામ જન્મભૂમિ સંબંધિત બાબતો પર બોલવાનો કોઈ નૈતિક અધિકાર નથી, પછી ભલે તે પ્રસાદ, દાન કે મંદિરના નિર્માણની વાત હોય. સમાજવાદી પાર્ટી ૨૦૨૭ માં ભારે કિંમત ચૂકવશે અને તેનો સંપૂર્ણ નાશ થવાનો છે. મંગળવારે વિધાનસભામાં ભારે હોબાળો થયો. હોબાળા વચ્ચે મુખ્યમંત્રી યોગી આદિત્યનાથે નિવેદન આપ્યું. સપા ધારાસભ્ય સચિન યાદવને સસ્પેન્ડ કરવામાં આવ્યા. હોબાળો વધતાં વિધાનસભા અધ્યક્ષ સતીશ મહાનાએ બુધવારે સવારે ૧૧ વાગ્યા સુધી ગૃહને મુલતવી રાખ્યું.
સસ્પેન્શન પછી, સચિન યાદવ વિધાનસભામાંથી બહાર આવ્યા અને ચૌધરી ચરણ સિંહની પ્રતિમા સામે ધરણા પર બેઠા. થોડા સમય પછી અન્ય ધારાસભ્યો તેમની સાથે જાડાયા. ધારાસભ્યોએ આરોપ લગાવ્યો કે તેઓ ભંડોળ ચોરીના મુદ્દા પર ચર્ચા કરવા માગે છે, પરંતુ સરકાર તેને સંબોધવા તૈયાર નથી.