ઝારખંડની રાજધાની રાંચીથી ચોંકાવનારા સમાચાર સામે આવ્યા છે. જન સૂરજ પાર્ટીના ડિજિટલ મીડિયા મેનેજર દેવપાલિક ગુપ્તાનો મૃતદેહ રાંચીના અંગારા વિસ્તારમાં મળી આવ્યો છે. જન સૂરજ ચૂંટણી રણનીતિકારમાંથી રાજકારણી બનેલા પ્રશાંત કિશોરની પાર્ટી છે. અહેવાલો અનુસાર, મંગળવારે રાંચીના અંગારા પોલીસ સ્ટેશન વિસ્તારમાં રેલ્વે ટ્રેક નજીક પાર્ટીના ડિજિટલ મીડિયા મેનેજર દેવપાલિક ગુપ્તા (૩૧) નો મૃતદેહ મળી આવ્યો હતો.
અહેવાલો અનુસાર, જન સૂરજ પાર્ટીના ડિજિટલ મીડિયા મેનેજર દેવપાલિક ગુપ્તા રાંચી-પટણા જન શતાબ્દી એક્સપ્રેસમાંથી રહસ્યમય રીતે ગાયબ થઈ ગયા હતા. રાંચીમાં પાટા નજીક તેમનો મૃતદેહ મળી આવ્યાના સમાચારથી વિસ્તારમાં ખળભળાટ મચી ગયો હતો અને સ્થાનિક લોકો ઘટનાસ્થળે એકઠા થઈ ગયા હતા. પોલીસ તમામ સંભવિત પાસાઓ પર વિચાર કરીને આ કેસની તપાસ કરી રહી છે.
સમગ્ર ઘટના અંગે, અંગારા પોલીસ સ્ટેશનના ઇન્ચાર્જ ગૌતમ કુમાર રાજવારે જણાવ્યું હતું કે રાંચી-મુરી લાઇન પર જરવાડીહ ગામમાં રેલ્વે ટ્રેક નજીક દેવપાલિક ગુપ્તાનો મૃતદેહ મળી આવ્યો હતો. સ્ટેશન ઇન્ચાર્જના જણાવ્યા અનુસાર, “પ્રારંભિક તપાસ સૂચવે છે કે દેવપાલિક ગુપ્તાનું મૃત્યુ આકસ્મિક રીતે ચાલતી ટ્રેનમાંથી પડી જવાથી થયું હતું.” સ્ટેશન ઇન્ચાર્જે માહિતી આપી છે કે મૃતદેહને પોસ્ટમોર્ટમ માટે રાંચીના રિમ્સ મોકલવામાં આવશે. મૃતકના પરિવારના નિવેદનોના આધારે અકુદરતી મૃત્યુનો કેસ નોંધવામાં આવશે. નોંધનીય છે કે જમશેદપુરમાં ગીતાંજલી એક્સપ્રેસમાં અગાઉ એક દર્દીનું મૃત્યુ થયું હતું. આ સમય દરમિયાન, મુસાફરોને ૧૨ કલાક સુધી મૃતદેહની બાજુમાં મુસાફરી કરવાની ફરજ પડી હતી.
મળતી માહિતી અનુસાર, મૃતક દેવપાલિક ગુપ્તાના એક સાથીએ જણાવ્યું હતું કે દેવપાલિક સોમવારે રાંચી રેલ્વે સ્ટેશનથી ટ્રેનમાં ચઢ્યો હતો. ટ્રેન બપોરે લગભગ ૨ઃ૨૫ વાગ્યે રવાના થઈ હતી. લગભગ ૧૦ મિનિટ પછી, દેવપાલિકે તેના સાથીઓને કહ્યું કે તે કંઈક ખાવા માટે પેન્ટ્રી કારમાં જઈ રહ્યો છે, પરંતુ તે પાછો ફર્યો નહીં. આ પછી, તેના સાથીઓએ પેન્ટ્રી કાર સહિત દરેક કોચમાં દેવપાલિકની શોધ કરી. જાકે, તે ટ્રેનમાં ક્યાય મળ્યો ન હતો.જીઆરપીમાં ફરિયાદ નોંધાવવામાં આવી હતી અને શોધખોળ અભિયાન શરૂ કરવામાં આવ્યું હતું.