ઓડિશા સરકારે શુક્રવારે રાહત અને બચાવ કામગીરી વધુ તીવ્ર બનાવી. સરકાર પૂરગ્રસ્ત ગંજમ અને ગજપતિ જિલ્લામાં હવાથી ખોરાકના પેકેટ છોડવાની તૈયારી કરી રહી છે. ચક્રવાત અર્ણબ દરમિયાન સતત વરસાદને કારણે આવેલા પૂરમાં હજારો લોકો ૨૪ કલાકથી વધુ સમયથી ફસાયેલા છે. મુખ્યમંત્રી મોહન ચરણ માઝી, જેમની પાસે જળ સંસાધન વિભાગ પણ છે, તેમણે ગંજમ અને ગજપતિ જિલ્લામાં અણધાર્યા ભારે વરસાદ અંગે ચિંતા વ્યક્ત કરી.
મુખ્યમંત્રીએ આજે એક બેઠકમાં કહ્યું, “ચક્રવાત અર્ણબની તૈયારીના ભાગ રૂપે, વહીવટીતંત્રને અપેક્ષા હતી કે મલકાનગિરી સૌથી વધુ અસરગ્રસ્ત થશે. જાકે, કોઈએ કલ્પના પણ નહોતી કરી કે ગંજમ જિલ્લામાં આટલો ભારે વરસાદ અને ગંભીર પૂર આવશે.” તેમણે ઉમેર્યું કે ૨૪ કલાકમાં ગંજમ જિલ્લાના પાત્રપુર બ્લોકમાં ૫૪ સેમી વરસાદ નોંધાયો છે. વધુમાં, ગંજમ અને ગજપતિના અન્ય ઘણા વિસ્તારોમાં પણ અસામાન્ય રીતે ભારે વરસાદ પડ્યો, જેના કારણે ગંભીર પૂર આવ્યું. મુખ્ય સચિવ અનુ ગર્ગે કહ્યું, “૨૪ કલાકમાં ગંજમમાં વરસાદનું પ્રમાણ તે પ્રદેશ માટે વાર્ષિક સરેરાશ વરસાદ કરતાં વધી ગયું છે.”
તેણીએ સમજાવ્યું કે પૂરના પાણીનો પ્રવાહ એટલો મજબૂત હતો કે દ્ગડ્ઢઇહ્લ અને ઓડીઆરએએફ કર્મચારીઓ ઘણા અસરગ્રસ્ત વિસ્તારોમાં પહોંચી શક્ય નહીં. તેથી, ભારતીય કોસ્ટ ગાર્ડને ફસાયેલા લોકોને બચાવવા અને ગંજમ જિલ્લાના મુશ્કેલ વિસ્તારોમાં ખોરાકના પેકેટ પહોંચાડવા વિનંતી કરવામાં આવી છે. આપત્તિ વ્યવસ્થાપન મંત્રી સુરેશ પૂજારીએ જણાવ્યું હતું કે ગંજમમાં પૂરથી આશરે ૫૦,૦૦૦ લોકો ગંભીર રીતે પ્રભાવિત થયા છે.
આંધ્રપ્રદેશના મુખ્યમંત્રી એન. ચંદ્રબાબુ નાયડુ ચક્રવાત પછીના તેમના ક્ષેત્ર નિરીક્ષણના બીજા દિવસે મોગલથુરુની મુલાકાત લીધી. તેમણે ચક્રવાત અર્નબથી થયેલા ભારે વરસાદથી થયેલા નુકસાનનું મૂલ્યાંકન કરવા માટે હવાઈ સર્વેક્ષણ કર્યું.
મુખ્ય સચિવે કહ્યું કે ગંજમ જિલ્લામાં ૨૧ વિસ્તારો ઓળખવામાં આવ્યા છે જ્યાં ખોરાક અને પાણી પહોંચાડવાના અન્ય કોઈ માધ્યમ નથી. આ વિસ્તારોમાં ફૂડ પેકેટ એરડ્રોપ કરવા માટે સંરક્ષણ હેલિકોપ્ટરનો ઉપયોગ કરવામાં આવી રહ્યો છે. મંત્રીએ જણાવ્યું હતું કે છેલ્લા ૧૨ કલાકમાં વરસાદ ઓછો થયા પછી, રાષ્ટ્રીય આપત્તિ પ્રતિભાવ દળ અને ઓડિશા આપત્તિ રેપિડ એક્શન ફોર્સના કર્મચારીઓ પૂરના પાણીથી ઘેરાયેલા વિસ્તારોમાં રાંધેલા ખોરાકનું વિતરણ કરશે. પૂજારીએ જણાવ્યું હતું કે પાણીના તીવ્ર પ્રવાહને કારણે, આધુનિક બોટનો ઉપયોગ કરીને પણ અસરગ્રસ્ત લોકો સુધી પહોંચવું અશક્ય હતું. તેમણે કહ્યું કે રાજ્યભરમાં તૈનાત ૩૧૩ બચાવ ટીમોમાંથી, ૧૦૦ થી વધુ ટીમો ગંજમ અને ગજપતિ જિલ્લામાં કાર્યરત છે.