મનસુખ હિરેન હત્યા કેસ અને ઉદ્યોગપતિ મુકેશ અંબાણીના નિવાસસ્થાન એન્ટિલિયાની બહાર વિસ્ફોટકોની જપ્તીના આરોપી, બરતરફ પોલીસ અધિકારી સચિન વાઝેને મળેલા જામીન પર બોમ્બે હાઈકોર્ટે વચગાળાનો સ્ટે મૂક્યો છે. મંગળવારે, એક ખાસ એનઆઇએ કોર્ટે કડક શરતો સાથે વાઝેને જામીન આપ્યા. રાષ્ટ્રીય તપાસ એજન્સીએ ખાસ કોર્ટના નિર્ણયને હાઈકોર્ટમાં પડકાર્યો છે. બુધવારે એનઆઇએની અપીલની સુનાવણી જસ્ટિસ ગિરીશ કુલકર્ણી અને નીલા ગોખલેની બેન્ચ સમક્ષ થઈ હતી.
સુનાવણી દરમિયાન,એનઆઇએનું પ્રતિનિધિત્વ કરતા એડિશનલ સોલિસિટર જનરલ અનિલ સિંહે કહ્યું કે ખાસ કોર્ટનો આદેશ અસંગતતાઓથી ભરેલો છે. જામીન આપતી વખતે ઘણી હકીકતોને અવગણવામાં આવી હતી. કેસમાં, ઉદ્યોગપતિ મુકેશ અંબાણીના ઘરની બહાર તૈનાત સુરક્ષા કર્મચારીઓનું નિવેદન નોંધવામાં આવ્યું હતું. આ દલીલો સાંભળ્યા પછી, બેન્ચે જામીનના આદેશ પર વચગાળાનો સ્ટે મૂક્યો. આનો અર્થ એ છે કે વાઝેને હવે થોડો વધુ સમય જેલમાં વિતાવવા પડશે. આ કેસમાં આગામી સુનાવણી ૭ ઓક્ટોબરે થશે.
ખાસ કોર્ટે આરોપીને લાંબા ગાળાના જેલ રોકાણના આધારે જામીન આપ્યા. કોર્ટે જણાવ્યું હતું કે અંબાણી પરિવારને આતંકિત કરવામાં આવ્યો હતો તે દર્શાવતી કોઈ સામગ્રી રેકોર્ડ પર નથી. અંબાણી પરિવારની દૈનિક પ્રવૃત્તિઓને અસર થઈ હોવાના કોઈ પુરાવા પણ નથી. આ કેસ ફેબ્રુઆરી ૨૦૨૧ થી ત્રણ એકબીજા સાથે જાડાયેલી એફઆઇઆર સાથે સંબંધિત છે. ૨૫ ફેબ્રુઆરી, ૨૦૨૧ ના રોજ, ઉદ્યોગપતિ મુકેશ અંબાણીના મુંબઈ સ્થિત નિવાસસ્થાન, એન્ટિલિયાની બહાર પાર્ક કરેલી સ્કોર્પિયો મળી આવી હતી. વાહનમાંથી વીસ જિલેટીન સ્ટિક અને ધમકીભર્યો પત્ર મળી આવ્યો હતો.
વાહન થાણેના ઉદ્યોગપતિ મનસુખ હિરેનનું હતું, જેમણે થોડા દિવસો પહેલા તેમનું વાહન ચોરાઈ ગયાની ફરિયાદ નોંધાવી હતી. થોડા દિવસો પછી, ૪ માર્ચે, મનસુખ હિરેન ગુમ થઈ ગયા, અને બીજા દિવસે થાણેની એક ખાડીમાંથી તેમનો મૃતદેહ મળી આવ્યો. ત્યારબાદ, તેમની પત્નીની ફરિયાદના આધારે તેમના મૃત્યુ અંગે એક અલગ કેસ નોંધવામાં આવ્યો. કેન્દ્ર સરકારે ત્રણેય કેસની તપાસએનઆઇએને સોંપી, જેણે માર્ચ ૨૦૨૧ માં સચિન વાઝેની ધરપકડ કરી.