નાસિક ટીસીએસ કેસના આરોપી નિદા ખાનની એઆઇએમઆઇએમ કાઉન્સીલરના ઘરેથી ધરપકડ બાદ મહારાષ્ટ્રના મંત્રી નિતેશ રાણેએ અસદુદ્દીન ઓવૈસી પર નિશાન સાધ્યું. રાણેએ કહ્યું કે એઆઇએમઆઇએમ એક આતંકવાદી સંગઠન છે. ઓસામા બિન લાદેન અને અસદુદ્દીન ઓવૈસીમાં કોઈ ફરક નથી. ઓસામા બિન લાદેને અલ-કાયદા દ્વારા જે કર્યું હતું, તે અસદુદ્દીન ઓવૈસી હવે એઆઇએમઆઇએમ દ્વારા કરી રહ્યા છે. ભાજપ છોડી ચૂકેલા ધારાસભ્ય અને હિન્દુત્વ નેતા ટી. રાજા સિંહે પણ આ મુદ્દા પર હુમલો કર્યો. રાજા સિંહે માફીની માંગ કરી છે.
નીતેષ રાણેએ પૂછ્યું, “તેઓએ તેમની ચૂંટણી પછી કઈ નોંધપાત્ર સિદ્ધિ મેળવી છે? તેમના મેનિફેસ્ટોમાં કહેવામાં આવ્યું છે, ‘અમે જેહાદ કરીશું.’ જેમ આપણે પીએફઆઇ પર પ્રતિબંધ મૂક્યો હતો, તેમ એઆઇએમઆઇએમ પર પણ પ્રતિબંધ મૂકવો જોઈએ.” સ્ટાફને ધર્માંતરણ માટે ઉશ્કેરવાના આરોપોનો સામનો કરી રહેલી ટીસીએસની ભૂતપૂર્વ કર્મચારી નિદા ખાનની પોલીસે છત્રપતિ સંભાજીનગર (અગાઉ ઔરંગાબાદ) માં ધરપકડ કરી હતી. તે એઆઇએમઆઇએમ કાઉન્સીલર મતીન પટેલ દ્વારા આપવામાં આવેલા સ્થાન પર મળી આવી હતી.
નાસિક ટીસીએસ કેસની તપાસમાં ખુલાસો થયો છે કે આરોપી નિદા ખાને ધર્માંતરણનો પ્રયાસ કર્યો હતો. તેણીએ પીડિતાના ઘરે ધાર્મિક વિધિઓ અને ધાર્મિક પ્રવૃત્તિઓ કરવા માટે માત્ર મુલાકાત જ નહોતી લીધી પરંતુ તેણીને ધર્માંતરણ કરવાનો પ્રયાસ કરવા માટે અસંખ્ય લિંક્સ પણ મોકલી હતી. પોલીસને શંકા છે કે એઆઇએમઆઇએમ કાઉન્સીલર મતીન પટેલે પણ નાણાકીય સહાય પૂરી પાડી હતી. પોલીસ આ મામલાની તપાસ કરી રહી છે. પોલીસે પીડિતાને મોકલેલા ૧૭૧ ધાર્મિક લિંક્સ કબજે કર્યા છે. કોર્ટે નિદા ખાનને ૧૧ મે સુધી પોલીસ કસ્ટડીમાં મોકલી દીધા છે. પોલીસે નિદા ખાનનું નિવેદન નોંધ્યું છે.