સમાજવાદી પાર્ટીના રાષ્ટ્રીય અધ્યક્ષ અખિલેશ યાદવે ભાજપમાં ચાલી રહેલા કથિત આંતરિક ઝઘડા પર કટાક્ષ કરતા મજાકમાં કહ્યું કે “૧૦૦ ધારાસભ્યોને લાવીને મુખ્યમંત્રી બનવાની” તેમની જૂની ઓફર હજુ પણ યથાવત છે. સમાજવાદી પાર્ટીના અધ્યક્ષે વધુમાં કહ્યું કે જે કોઈ ૧૦૦ ધારાસભ્યોને પોતાની સાથે લાવશે તેને એક અઠવાડિયા માટે મુખ્યમંત્રી બનાવવામાં આવશે. તેમણે આ ટિપ્પણી મુખ્યમંત્રી યોગી આદિત્યનાથની જાપાન મુલાકાતના સંદર્ભમાં કરી હતી.
અગાઉ, અખિલેશ યાદવે જગદગુરુ રામભદ્રાચાર્ય અંગે આકરું નિવેદન આપ્યું હતું. તેમણે કહ્યું હતું કે મુખ્યમંત્રી તરીકેના કાર્યકાળ દરમિયાન રામભદ્રાચાર્ય સામેનો કેસ પાછો ખેંચવો તેમની ભૂલ હતી અને તેમને તે સમયે જેલમાં મોકલવા જાઈતા હતા. તેમણે આ ટિપ્પણી રામભદ્રાચાર્યના શિષ્ય આશુતોષ બ્રહ્મચારીના સંદર્ભમાં કરી હતી, જેમણે સ્વામી અવિમુક્તેશ્વરાનંદ સરસ્વતી પર જાતીય સતામણીનો આરોપ લગાવ્યો હતો.
પાર્ટી મુખ્યાલયમાં એક પત્રકાર પરિષદમાં, સપા વડાએ નાયબ મુખ્ય પ્રધાન બ્રજેશ પાઠકનું નામ લીધા વિના, બટુક પૂજન પર પણ ટિપ્પણી કરતા કહ્યું કે પહેલા લોકો શિખા ખેંચીને અપમાન કરે છે. પછી, કેટલાક લોકો બટુકની પૂજા કરવાનું શરૂ કરે છે. નદી સફાઈના મુદ્દા પર સરકાર પર હુમલો કરતા, સપા પ્રમુખે કહ્યું કે સરકાર ગોમતી, કાલી, હિંડોન અને યમુના નદીઓની સફાઈ માટે ગંભીર નથી. રાજ્યમાં વિકાસના કામો ઠપ્પ છે, ભ્રષ્ટાચાર વધી રહ્યો છે, અને પાણીની ટાંકીઓ ફૂટી રહી છે.