સુરતના વરાછા વિસ્તારમાં ૧૧ વર્ષીય ધોરણ-૬ની વિદ્યાર્થિનીના આપઘાતથી મૃત્યુની કરુણ ઘટના સામે આવી છે. સહજાનંદ સોસાયટીમાં રહેતી રોલી નામની બાળકીનું ૧૨ સપ્ટેમ્બરના રોજ મોત થયું હતું. પ્રાથમિક તપાસમાં મોબાઈલ ફોનને લઈને માતા સાથે થયેલી વાતચીત બાદ બાળકી દુઃખી થઈ હોવાની માહિતી સામે આવી છે. જોકે, તેના મૃત્યુ નું ચોક્કસ કારણ જાણવા પોલીસ તપાસ ચાલુ છે. સમગ્ર મામલે વરાછા પોલીસે અકસ્માતે મોતનો ગુનો નોંધીને તપાસ હાથ ધરી છે.
પ્રાથમિક માહિતી મુજબ, રોલીને મોબાઈલ ફોનનો ઉપયોગ કરવાની આદત હતી. ઘટનાના દિવસે બપોરે તેણે માતા પાસે મોબાઈલ ફોન માંગ્યો હતો. જોકે, માતાએ ફોન આપવાનો ઇનકાર કર્યો હતો અને કામ પર જતી વખતે ફોન પોતાની સાથે લઈ ગયા હતા. પોલીસની પ્રાથમિક તપાસમાં બાળકી આ બાબતથી મનમાં દુઃખી થઈ હોવાની શક્્યતા વ્યક્ત કરવામાં આવી છે. જોકે, માત્ર મોબાઈલ અંગેની વાતચીત જ તેના અંતિમ પગલાનું કારણ હતી કે અન્ય કોઈ કારણ પણ જવાબદાર હતું, તે અંગે હાલ કોઈ અંતિમ નિષ્કર્ષ સામે આવ્યો નથી.
રોલીનો પરિવાર મૂળ મધ્યપ્રદેશના મુરેના જિલ્લાનો રહેવાસી છે. તેના પિતા વિજયભાઈ કુષ્વાહ સુરતના વરાછા વિસ્તારમાં પરિવાર સાથે રહે છે અને કડિયાકામ કરીને પરિવારનું ગુજરાન ચલાવે છે. પરિવારમાં માતા-પિતા ઉપરાંત ત્રણ પુત્રી અને એક પુત્ર છે. પરિવારને આર્થિક રીતે મદદરૂપ થવા માટે રોલીની માતા પણ નજીકના હોટ ફિક્સના કારખાનામાં મજૂરી કરવા જાય છે. રોલી પરિવારની સૌથી મોટી પુત્રી હતી. તેણે વતનમાં ધોરણ-૫ સુધી અભ્યાસ કર્યા બાદ સુરતમાં ધોરણ-૬માં અભ્યાસ શરૂ કર્યો હતો.
ઘટનાના સમયે રોલીની માતા પોતાના પુત્રને સાથે લઈને કામ પર ગઈ હતી. બીજી તરફ, રોલીની બંને નાની બહેનો ઘરની બહાર રમી રહી હતી. થોડા સમય બાદ નાની બહેનોને ભૂખ લાગતાં તેઓ ઘરે પરત આવી હતી. તેમણે દરવાજા ખખડાવ્યો, પરંતુ લાંબા સમય સુધી દરવાજા ન ખુલતાં બંને બાળકીઓ રડવા લાગી હતી. આ દરમિયાન માતા પણ કામ પરથી પરત આવી હતી. બાળકીઓને રડતી જાઈ આસપાસના લોકોની મદદથી ઘરમાં પ્રવેશ કરવામાં આવ્યો હતો. ત્યારબાદ રોલી ગંભીર હાલતમાં મળી આવી હતી. પરિવારજનો અને સ્થાનિક લોકો દ્વારા તાત્કાલિક ૧૦૮ એમ્બ્યુલન્સને જાણ કરવામાં આવી હતી. રોલીને સારવાર માટે સ્મીમેર હોસ્પિટલ લઈ જવામાં આવી હતી. હોસ્પિટલમાં ફરજ પરના તબીબોએ તપાસ કર્યા બાદ તેને મૃત જાહેર કરી હતી. ઘટનાની જાણ થતાં વરાછા પોલીસની ટીમ પણ સ્થળ પર પહોંચી હતી અને સમગ્ર મામલે તપાસ શરૂ કરી હતી.
હાલ પોલીસે અકસ્માતે મોતનો ગુનો નોંધીને તપાસ શરૂ કરી છે. બાળકીના પરિવારજનોના નિવેદનો સહિત ઘટનાના તમામ પાસાંની તપાસ કરવામાં આવી રહી છે. મોબાઈલ ફોનને લઈને થયેલી વાતચીત, બાળકીની માનસિક સ્થિતિ અને ઘટનાક્રમ અંગે પોલીસ માહિતી મેળવી રહી છે. પોસ્ટમોર્ટમ તથા તપાસની પ્રક્રિયા બાદ મૃત્યુ અંગે વધુ સત્તાવાર વિગતો સામે આવી શકે છે.
આ ઘટના ફરી એક વખત બાળકોના મોબાઈલ ઉપયોગ, પરિવાર સાથેના સંવાદ અને બાળકોમાં ઊભી થતી લાગણીઓને ગંભીરતાથી સમજવાની જરૂરિયાત તરફ ધ્યાન દોરે છે. બાળકના વર્તનમાં અચાનક ફેરફાર, અસામાન્ય ઉદાસીનતા અથવા પોતાને નુકસાન પહોંચાડવા જેવી વાતો જણાય તો પરિવારજનોએ તેને અવગણવી નહીં અને તાત્કાલિક વિશ્વાસુ વ્યક્તિ તથા યોગ્ય નિષ્ણાતની મદદ લેવી જોઈએ.