સરકારી ઇજનેરી કોલેજ, દાહોદ ખાતે Adani Cement FutureX પ્લેટફોર્મ અંતર્ગત વિદ્યાર્થીઓ માટે “Strength & Trust: A Roadmap to Succeed in Professional and Personal Life” વિષય પર પ્રેરણાદાયી ઓનલાઈન વ્યાખ્યાનનું આયોજન કરવામાં આવ્યું હતું.
આ પ્રસંગે અદાણી ગ્રૂપના સિમેન્ટ બિઝનેસના ચીફ એક્ઝિક્યુટિવ ઓફિસર (CEO) શ્રી વિનોદ બહેતીએ ઓનલાઈન માધ્યમથી વિદ્યાર્થીઓને સંબોધિત કરતાં વ્યાવસાયિક તથા વ્યક્તિગત જીવનમાં સફળતા માટે જરૂરી મૂલ્યો, નેતૃત્વ, વ્યક્તિત્વ વિકાસ અને નૈતિકતાના મહત્વ અંગે વિસ્તૃત માર્ગદર્શન પૂરું પાડ્યું હતું.
શ્રી બહેતીએ જણાવ્યું હતું કે વ્યાવસાયિક અને વ્યક્તિગત જીવનમાં સફળતા મેળવવા માટે શિસ્ત, વિશ્વાસ, પ્રામાણિકતા, જવાબદારી અને સતત શીખવાની ભાવના અત્યંત જરૂરી છે. તેમણે ભારપૂર્વક જણાવ્યું હતું કે વ્યક્તિનું ચારિત્ર્ય અને વિશ્વસનીયતા તેની સૌથી મોટી મૂડી છે. વિદ્યાર્થીઓએ દરેક પડકારને વિકાસની તક તરીકે સ્વીકારી સકારાત્મક અભિગમ, આત્મવિશ્વાસ અને દૃઢ સંકલ્પ સાથે પોતાના લક્ષ્યો તરફ સતત આગળ વધવું જોઈએ. જીવનમાં સાચી સફળતા માત્ર જ્ઞાનથી નહીં, પરંતુ મૂલ્યનિષ્ઠા, સતત પ્રયત્ન અને ઉત્તમ કાર્યસંસ્કૃતિ દ્વારા પ્રાપ્ત થાય છે.
તેમણે વધુમાં જણાવ્યું કે આજના સ્પર્ધાત્મક યુગમાં માત્ર ટેક્નિકલ જ્ઞાન પૂરતું નથી, પરંતુ શિસ્ત (Discipline), સતત પ્રયત્ન (Consistency), પ્રામાણિકતા (Integrity), વિશ્વસનીયતા (Reliability) અને વિશ્વાસ (Trust) જેવા ગુણો જ વ્યક્તિને લાંબા ગાળે સફળતા અપાવે છે. “શક્તિ વ્યક્તિને સન્માન અપાવે છે, જ્યારે વિશ્વાસ નવી તકોનું સર્જન કરે છે,” એમ તેમણે જણાવ્યું હતું.
વ્યાખ્યાન દરમિયાન તેમણે ટાટા ગ્રૂપ, ઇન્ફોસિસ, મહિન્દ્રા તથા અદાણી ગ્રૂપ જેવા અગ્રણી ઉદ્યોગોના ઉદાહરણો દ્વારા સમજાવ્યું કે કોઈપણ સંસ્થા કે વ્યક્તિની લાંબા ગાળાની સફળતા પાછળ નૈતિક મૂલ્યો, પારદર્શિતા, વિશ્વાસ અને શિસ્તબદ્ધ કાર્યશૈલીનો મહત્વપૂર્ણ ફાળો રહેલો છે. તેમણે વિદ્યાર્થીઓને સમયપાલન, સત્યનિષ્ઠા, જવાબદારી, આપેલા વચનોનું પાલન અને સતત આત્મવિકાસ માટે પ્રેરિત કરતાં જણાવ્યું કે “કુશળતા તકના દ્વાર ખોલે છે, પરંતુ વિશ્વસનીયતા તે દ્વાર ખુલ્લો રાખે છે.”
અંતમાં તેમણે વિદ્યાર્થીઓને સંદેશ આપતાં જણાવ્યું કે “નાની શરૂઆત કરો, દરરોજ સતત પ્રયત્ન કરો અને શિસ્તને તમારી ઓળખ બનાવો. સફળતા કોઈ એક દિવસની ઘટના નથી, પરંતુ સતત કરેલા સકારાત્મક પ્રયત્નોનું પરિણામ છે.”
આ પ્રેરણાદાયી વ્યાખ્યાન વિદ્યાર્થીઓ માટે અત્યંત ઉપયોગી અને પ્રભાવશાળી સાબિત થયું. વિદ્યાર્થીઓએ ઉત્સાહપૂર્વક ભાગ લઈ વ્યાવસાયિક જીવનમાં સફળતા માટે જરૂરી જીવનમૂલ્યો, નેતૃત્વ, જવાબદારી અને વ્યક્તિત્વ વિકાસ અંગે અમૂલ્ય માર્ગદર્શન પ્રાપ્ત કર્યું.