નગરપાલિકા તંત્રને ૧૫ દિવસનું આખરી અલ્ટીમેટમ: સત્તાવાર દરખાસ્ત નહીં મોકલાય તો અનિશ્ચિત મુદતના ધરણા અને આંદોલનની ચીમકી
મહીસાગર જિલ્લાના લુણાવાડા નગરપાલિકામાં છેલ્લા ઘણા વર્ષોથી રાત-દિવસ જોયા વગર શહેરની સફાઈ વ્યવસ્થા જાળવતા વર્ગ-૪ના રોજમદાર સફાઈ કામદારોને સિનિયોરિટીના ધોરણે કાયમી કરવાની ન્યાયિક માંગ સાથે આજરોજ તારીખ ૧૨ ઓગસ્ટ ૨૦૨૬ના રોજ લુણાવાડા નગરપાલિકા તંત્રને ૧૫ દિવસનું આખરી અલ્ટીમેટમ આપવામાં આવ્યું છે.
આ અંગે સામાજિક એકતા જાગૃતિ મિશન અને અખિલ ભારતીય શ્રમિક સંઘ (રજી.) ના સંયુક્ત ઉપક્રમે લુણાવાડા નગરપાલિકાના ચીફ ઓફિસરશ્રી તેમજ પ્રમુખશ્રીને એક લેખિત રજૂઆતપત્ર સોંપવામાં આવ્યો હતો. આ રજૂઆતમાં જણાવવામાં આવ્યું છે કે, વર્ષોથી અવિરત સેવા આપતા સફાઈ કામદારોને તેમનો બંધારણીય અને વ્યાજબી હક મળવો અત્યંત જરૂરી છે.
મુખ્ય માંગણીઓ:
૧. લુણાવાડા નગરપાલિકામાં વર્ગ-૪ની ઉપલબ્ધ ખાલી જગ્યાઓ પર વર્ષોથી સેવા આપતા સફાઈ કામદારોની સિનિયોરિટી અને સેવા સમયગાળાને પ્રાથમિકતા આપવી.
૨. સફાઈ કામદારોને કાયમી કરવા અંગેની સંપૂર્ણ સત્તાવાર દરખાસ્ત જરૂરી તમામ આધાર-પુરાવા સાથે પ્રાદેશિક કમિશનરશ્રી (વડોદરા ઝોન) તથા સંબંધિત ઉચ્ચ કચેરીને તાત્કાલિક મોકલી આપવી.
૧૫ દિવસનું અલ્ટીમેટમ અને આંદોલનની ચીમકી:
સંગઠનો દ્વારા સ્પષ્ટ ચેતવણી આપવામાં આવી છે કે જો આગામી ૧૫ દિવસમાં સત્તાવાર દરખાસ્ત ઉચ્ચ કચેરીએ મોકલવામાં નહીં આવે, તો તમામ પીડિત સફાઈ કામદારોને સાથે રાખીને લુણાવાડા નગરપાલિકા કચેરી સામે આવનાર ગણતરીના દિવસોમાં અનિશ્ચિત મુદતના ધરણા-પ્રદર્શન અને ઉગ્ર આંદોલન શરૂ કરવામાં આવશે.
આ બાબતે આગોતરી સૂચના અને જરૂરી કાર્યવાહી અર્થે રજૂઆતપત્રની નકલ મહીસાગર જિલ્લા કલેક્ટરશ્રી, નગરપાલિકાઓના પ્રાદેશિક કમિશનરશ્રી (વડોદરા ઝોન) તેમજ મહીસાગર જિલ્લા પોલીસ અધિક્ષકશ્રી (DSP) ને પણ મોકલી આપવામાં આવી છે.
આ સમગ્ર રજૂઆત સામાજિક એકતા જાગૃતિ મિશન અને અખિલ ભારતીય શ્રમિક સંઘ (રજી.) ના ગુજરાત પ્રદેશ અધ્યક્ષ શ્રી વિમલ સોલંકીના નેતૃત્વ હેઠળ કરવામાં આવી છે. વર્ષો જૂના આ પ્રશ્નનો વહેલી તકે ન્યાયી ઉકેલ આવે અને સિનિયોરિટીના ધોરણે કાયમી કરવાની પ્રક્રિયા શરૂ થાય તે માટે હવે લુણાવાડા નગરપાલિકા તંત્રના આગામી નિર્ણય પર સૌની નજર મંડાયેલી છે.