રાહુલ ગાંધીએ પાયાના સ્તરે સંગઠનને મજબૂત બનાવવા અને કાર્યકરો સાથે સીધો સંપર્ક વધારવા પર ભાર મૂક્યો.
કોંગ્રેસ નેતા રાહુલ ગાંધી સોમવારે અજમેર જિલ્લાના પુષ્કર પહોંચ્યા, જ્યાં તેમણે કોંગ્રેસના ૧૦-દિવસીય રાષ્ટ્રીય ચિંતન અને સંગઠન નિર્માણ તાલીમ શિબિરના સમાપન સમારોહમાં ભાગ લીધો. વાઇલ્ડ રોઝ રિસોર્ટ ખાતે આયોજિત શિબિરમાં દેશભરના કોંગ્રેસ પદાધિકારીઓ અને જિલ્લા પ્રમુખોને સંબોધતા રાહુલ ગાંધીએ પાયાના સ્તરે સંગઠનને મજબૂત બનાવવા અને કાર્યકરો સાથે સીધો સંપર્ક વધારવા પર ભાર મૂક્યો.
રાજસ્થાનના ૫૦ અને દિલ્હીના ૧૫ જિલ્લા પ્રમુખો સહિત રાજ્યના અધિકારીઓ શિબિરમાં હાજર રહ્યા હતા. તાલીમ શિબિરના મહત્વ પર પ્રકાશ પાડતા રાહુલ ગાંધીએ કહ્યું કે સંગઠનાત્મક શક્તી એ કોંગ્રેસની સૌથી મોટી તાકાત છે. તેમણે સંગઠનાત્મક વિસ્તરણ, જનસંપર્ક અને પાર્ટીની વિચારધારાને જનતા સુધી પહોંચાડવા અંગે જિલ્લા પ્રમુખોને માર્ગદર્શન આપ્યું. કાર્યક્રમ દરમિયાન, શિબિરમાં હાજરી આપનારા જિલ્લા પ્રમુખોના પરિવારો પણ કાર્યક્રમનો ભાગ બન્યા. રાહુલ ગાંધીએ પરિવારના સભ્યો સાથે સૌહાર્દપૂર્ણ મુલાકાત કરી અને તેમની સાથે ફોટા પણ પડાવ્યા.
આ પહેલાં, રાહુલ ગાંધી સવારે ૧૦ઃ૦૫ વાગ્યે કિશનગઢ એરપોર્ટ પર પહોંચ્યા, જ્યાં તેમનું સ્વાગત ભૂતપૂર્વ મુખ્યમંત્રી અશોક ગેહલોત, પ્રદેશ કોંગ્રેસ પ્રમુખ ગોવિંદ સિંહ દોતાસરા, રાજસ્થાનના પ્રભારી સુખજિંદર સિંહ રંધાવા અને ભૂતપૂર્વ નાયબ મુખ્યમંત્રી સચિન પાયલટ સહિત અનેક વરિષ્ઠ કોંગ્રેસ નેતાઓએ કર્યું. કિશનગઢના ધારાસભ્ય વિકાસ ચૌધરીએ રાહુલ ગાંધીનું પરંપરાગત હળ ભેટ આપીને સ્વાગત કર્યું. ત્યારબાદ રાહુલ ગાંધી રોડ માર્ગે પુષ્કર જવા રવાના થયા.
નોંધનીય છે કે કોંગ્રેસના રાષ્ટ્રીય અધ્યક્ષ મલ્લીકાર્જુન ખડગે પણ ચિંતન શિબિરમાં હાજરી આપવાના હતા, પરંતુ કોઈ કારણોસર છેલ્લી ઘડીએ તેમની મુલાકાત રદ કરવામાં આવી હતી. શિબિરના સમાપન સાથે, કોંગ્રેસના નેતાઓમાં સંગઠનાત્મક તાકાત અને ભાવિ રાજકીય રણનીતિ અંગે મહત્વપૂર્ણ ચર્ચાઓ થઈ.