15મા નાણાપંચથી સોલર લાઇટ, હેન્ડપંપ, નાળા અને શૌચાલયનાં કામો સુધી તપાસની માગ; TDO સ્થળ તપાસ કરી હિસાબ મેળવે અને ગેરરીતિ જણાય તો જવાબદારો સામે કાર્યવાહી કરે તેવી સ્થાનિકોની રજૂઆત
ધાનપુર, દાહોદ: દાહોદ જિલ્લાના ધાનપુર તાલુકાના પીપરીયા ગ્રામ પંચાયતમાં સરકારી ગ્રાન્ટના ઉપયોગને લઈને ગંભીર સવાલો ઊભા થયા છે. વિવિધ વિકાસકામો માટે ફાળવાયેલી સરકારી રકમનો વાસ્તવિક ઉપયોગ થયો છે કે નહીં, કામો સ્થળ પર પૂર્ણ થયાં છે કે નહીં અને સરકારી રેકોર્ડમાં દર્શાવેલી વિગતો વાસ્તવિક પરિસ્થિતિ સાથે મેળ ખાય છે કે નહીં, તે અંગે સ્થાનિકો દ્વારા તપાસની માગ કરવામાં આવી રહી છે.
સ્થાનિકોની રજૂઆત મુજબ, 15મા નાણાપંચ સહિત વિવિધ યોજનાઓ હેઠળ સોલર લાઇટ, હેન્ડપંપ, નાળા, શૌચાલય, સીસી રોડ અને પાણીની ટાંકી જેવાં કામોમાં તપાસ કરવાની જરૂર છે. ભગત ફળિયામાં અંદાજે રૂ. 1 લાખના નાળાના કામ અંગે સવાલો ઊઠ્યા છે. રૂ. 50 હજારના સામૂહિક શૌચાલયનું કામ અધૂરું હોવાની રજૂઆત પણ કરવામાં આવી છે.
ઉદેશિંગ ભૂરા બારીયાના ફળિયામાં રૂ. 50 હજારના સીસી કામ અંગે પણ સ્પષ્ટતા માગવામાં આવી છે. ગ્રામ પંચાયતના મકાન પર રૂ. 1,20,899ની સોલર લાઇટના કામની રકમ દર્શાવાઈ હોવા છતાં સ્થળ પર લાઇટ ઉપલબ્ધ ન હોવાનો સ્થાનિકો દ્વારા દાવો કરવામાં આવ્યો છે. આ ઉપરાંત શંકરભાઈ દલપતભાઈના ઘર પાસે રૂ. 50 હજારના હેન્ડપંપના કામ અંગે પણ તપાસની માગ ઊઠી છે.
પાણીની ટાંકી, પાણીના ઓપરેટરના પગાર, શૌચાલય અને અન્ય વિકાસકામો અંગે પણ ખર્ચની વિગતો, કામની ગુણવત્તા અને સ્થળ પરની સ્થિતિની ચકાસણી કરવાની માગ કરવામાં આવી રહી છે. સરપંચના સસરા વહીવટી કામગીરી સંભાળતા હોવા અંગે પણ સ્થાનિકોમાં ચર્ચા હોવાનું સામે આવ્યું છે. જોકે, આ તમામ મુદ્દાઓની સત્તાવાર તપાસ બાદ જ હકીકત સ્પષ્ટ થઈ શકશે.
હવે તંત્ર સામે સીધા સવાલો!
દર્શાવેલી ગ્રાન્ટ સામે તમામ વિકાસકામો ખરેખર પૂર્ણ થયાં છે કે નહીં?
સોલર લાઇટ, હેન્ડપંપ અને નાળાનાં કામોની સ્થળ પર ચકાસણી થશે?
સરકારી રેકોર્ડ, બિલ-વાઉચર અને કામોની માપણીની વિગતો તપાસવામાં આવશે?
જો નાણાકીય ગેરરીતિ કે નિયમભંગ સાબિત થાય તો જવાબદાર સામે કાર્યવાહી થશે?
સ્થાનિકોની મુખ્ય માગ છે કે તાલુકા વિકાસ અધિકારી (TDO) દ્વારા પીપરીયા ગ્રામ પંચાયતનાં તમામ સંબંધિત કામોની નિષ્પક્ષ સ્થળ તપાસ કરવામાં આવે, સરકારી ગ્રાન્ટના ખર્ચનો હિસાબ જાહેર કરવામાં આવે અને દસ્તાવેજો તથા વાસ્તવિક કામ વચ્ચે તફાવત જણાય તો નિયમ મુજબ કાર્યવાહી કરવામાં આવે.
લાખોની ગ્રાન્ટના ઉપયોગ અંગે ઊઠેલા સવાલોનો જવાબ હવે તપાસથી જ મળશે. પીપરીયા ગ્રામ પંચાયતના વિકાસકામો અંગે તંત્ર પારદર્શક તપાસ હાથ ધરી હકીકત જાહેર કરશે કે કેમ, તેના પર સ્થાનિકોની નજર મંડાયેલી છે.