ગુજરાતમાં કાળઝાળ ગરમીનો કહેર, તાપમાન ૪૨ સે સુધી પહોંચવાની આગાહી

ગુજરાત રાજ્યમાં હાલમાં કાળઝાળ ગરમીનો પ્રકોપ વધ્યો છે, ત્યારે હવામાન વિભાગે આગામી દિવસોને લઈને મહત્વપૂર્ણ આગાહી કરી છે. રાજ્યભરમાં તાપમાન સતત વધી રહ્યું છે અને લોકો ગરમીથી ત્રસ્ત બની રહ્યા છે.

હવામાન વિભાગના અનુમાન મુજબ, આગામી બે દિવસ દરમિયાન ગરમીમાં વધુ વધારો થવાની શક્યતા છે. રાજ્યના અનેક વિસ્તારોમાં તાપમાન ૪૦ ડિગ્રી સેલ્સિયસને પાર પહોંચી ગયું છે. રાજકોટ ૪૧.૯° સે સાથે રાજ્યનું સૌથી ગરમ શહેર બન્યું છે, જ્યારે સુરેન્દ્રનગર અને અમરેલીમાં પણ તાપમાન ૪૦° સેથી વધુ નોંધાયું છે.

વિભાગે વધુમાં જણાવ્યું છે કે આવનારા દિવસોમાં ગરમીનો પારો ૪૨° સે સુધી પહોંચી શકે છે. ખાસ કરીને બપોરના સમયે લોકોને બહાર ન નીકળવાની સલાહ આપવામાં આવી છે. ગરમીના કારણે હીટસ્ટ્રોક અને ડિહાઇડ્રેશન જેવી સમસ્યાઓ વધવાની શક્યતા હોવાથી લોકોને સાવચેત રહેવા સૂચના આપવામાં આવી છે.

આ વચ્ચે, થોડી રાહતના સંકેતો પણ સામે આવ્યા છે. હવામાન વિભાગ મુજબ ૧૯ અને ૨૦ એપ્રિલ દરમિયાન રાજ્યના કેટલાક જિલ્લાઓમાં હળવા વરસાદની શક્યતા છે. ખાસ કરીને સૌરાષ્ટ્ર વિસ્તારમાં આગામી બે દિવસ દરમિયાન માવઠાની આગાહી કરવામાં આવી છે. આ બદલાવના કારણે તાપમાનમાં થોડો ઘટાડો થઈ શકે છે અને લોકોને ગરમીમાંથી આંશિક રાહત મળી શકે છે.

એક તરફ તીવ્ર ગરમી અને બીજી તરફ માવઠાની આગાહીને કારણે હવામાનમાં અચાનક ફેરફાર જાવા મળી શકે છે, તેથી ખેડૂતો અને સામાન્ય નાગરિકોને સાવચેત રહેવાની સલાહ આપવામાં આવી છે.