બોલીવુડ અભિનેત્રી શિલ્પા શેટ્ટી સામે ચાલી રહેલા ૬૦ કરોડના છેતરપિંડીના કેસ અંગે એક નવું અપડેટ સામે આવ્યું છે. કેસની તપાસ કરી રહેલી ઇઓડબ્લ્યુએ કથિત ૬૦ કરોડના છેતરપિંડીના કેસમાં તેની તપાસનો વિસ્તાર કર્યો છે અને અભિનેત્રી શિલ્પા શેટ્ટી અને તેના પતિ રાજ કુન્દ્રા સામે ભારતીય દંડ સંહિતાની કલમ ૪૨૦ (છેતરપિંડી) ઉમેરી છે. અધિકારીઓના જણાવ્યા અનુસાર, ચાલુ તપાસ દરમિયાન બહાર આવેલા તથ્યોના આધારે આ કાર્યવાહી કરવામાં આવી છે. આ કેસમાં આરોપોની તપાસ કરવામાં આવી રહી છે, અને આગળની કાનૂની કાર્યવાહી ચાલુ રહેશે.
ઉદ્યોગપતિ દીપક કોઠારીની ફરિયાદના આધારે એફઆઇઆર દાખલ કરવામાં આવી હતી. ફરિયાદીના વકીલો દ્વારા જારી કરાયેલા નિવેદનમાં જણાવાયું છે કે તપાસ દરમિયાન બહાર આવેલા તથ્યોના આધારે,ઇઓડબ્લ્યુએ આઇપીસીની કડક કલમો ઉમેરી છે અને સંબંધિત મેજિસ્ટ્રેટને આ વિકાસ વિશે જાણ કરી છે. ઇઓડબ્લ્યુ એ કોર્ટને એ પણ જાણ કરી હતી કે તપાસ દરમિયાન વિશ્ર્વસનીય સાક્ષીઓના નિવેદનો અને ઇલેક્ટ્રોનિક પુરાવા એકત્રિત કરવામાં આવ્યા હતા. તપાસ એજન્સીના જણાવ્યા અનુસાર, રેકોર્ડ સૂચવે છે કે આ કેસમાં ફરિયાદી સાથે ૬૦ કરોડથી વધુની છેતરપિંડી કરવામાં આવી હતી. પૂરા પાડવામાં આવેલા પુરાવાના આધારે, તપાસ એજન્સીએ છેતરપિંડીના આરોપો ઉમેર્યા છે. અહેવાલો અનુસાર, આ કેસમાં મુખ્ય ફરિયાદી છેતરપિંડીની રકમને કારણે ટૂંક સમયમાં કેન્દ્રીય તપાસ એજન્સીનો સંપર્ક કરી શકે છે.
એ નોંધવું જોઈએ કે શિલ્પા શેટ્ટીને આ કેસના સંદર્ભમાં વિદેશ પ્રવાસ કરવા પર પ્રતિબંધ મૂકવામાં આવ્યો હતો. તાજેતરમાં, શિલ્પાએ આ કેસની તપાસ દરમિયાન લાદવામાં આવેલા વિદેશ પ્રવાસ પરના પ્રતિબંધને પડકારતી અરજી દાખલ કરી હતી, જેમાં તેણીએ વિદેશ પ્રવાસની પરવાનગી માંગી હતી. જોકે, બાદમાં કોર્ટે આ અરજીને ફગાવી દીધી હતી અને વિદેશ પ્રવાસ પર પ્રતિબંધ લાદ્યો હતો. આ મામલાની તપાસ હવે ચાલી રહી છે.